Pait nga balaod sa asin
Sama sa ubang mga balaod, maayo ang katuyoan sa Republic Act 8172, nga mas naila nga ASIN Law (Act for Salt Iodization Nationwide): Pagsagol og iodine sa mga produkto sa asin aron kalikayang mga sakit gikan sa kakuwang sa iodine nga nakaigo sa duha ka bilyon ka molupyo sa kalibotan, labi na sa kabos nga mga nasud sama sa Pilipinas.
Pero sama sa ubang mga balaod, ang ASIN Law wa matarung sa pagpatuman. Gawas nga wa katuman sa prinsipal nga katuyoan, mao pa gyod karon ang gibasol sa paghagsa sa industriya sa asin ug pagdangop sa nasud sa importasyon sa 93% sa tinuig nga panginahanglan sa asin.
* * *
Ubos sa balaod nga gipirmahan niadtong 1995 nilang anhing Presidente Fidel Ramos, kanhi House Speaker Jose de Venecia ug anhing Senate President Neptali Gonzales, ang Department of Science and Technology (DOST) maoy mohimo og kahimanan ug motudlo sa mga mag-uuma ug mga kompaniya sa asin sa teknolohiya sa iodization sa asin.
Pero tungod sa kakuwang sa pundo ug kakugi wa matuman sa DOST ang tahas. Napugos ang mga mag-uuma ug gagmayng kompaniya pagbiya sa industriya sa asin. Salamat sa kapakyas sa gobiyerno pagsubli sa mga implikasyon sa ASIN Law sa niaging 27 ka tuig, 7% na lang sa atong asin ang hinimo sa nasud.
* * *
Bisan ang dagkong kompaniya nihunong na sab paghimo ug mga produkto sa asin. Nagkagamay ang ilang merkado. Kay gipalabi sa ubang kanasuran ang mga produkto nga naggamit og natural salt, o sea salt. Ilang gilikayan ang iodized, nga giisip nga processed ug fortified, salt.
Naanugon ang atong 36,000 ka kilometro nga kabaybayonan (6% ra untay gikinahanglan pagtagbaw sa nasudnong panginahanglan sa asin). Tungod sa balaod nga gawas nga nabiyaan na sa panahon wa pa gyod kapatuman sa iodization sa asin.
* * *
Pamilyar ang mga lusot sa kapakyas pagpatuman sa balaod:
• Way monitoring teams sa daghang entry points sa delivery sa asin;
• Kuwang ang salt testing kits para sa local government units (LGUs);
• Ang rapid testing kits makakita lang sa presensiya di sa gidaghanon sa iodine; ug
• Di iodized nga industrial salt na ang gipamaligya sa mga tindahan para sa tawhanong konsumo.
* * *
- Latest
