Pangandam

Agosto 7, 2022: Ikanapulog-siyam nga Domingo sulod sa tuig

Mga Pagbasa: Kin. 18;6-9/Sal. 33/Heb. 11;1-2,4,8-19/Lk. 12;32-48

Niadtong nitambong pa ko sa mga ginagmay nga jamboree nahimo kong pambato sa mga quiz bees. Ang dili gyud nako makalimtan mao man balaod sa boy scout no. 6 nga nagkanayon: “Laging Handa.”

Ug kun ato kining i-import sa alang sa atong ebanghelyo karon, gipahinumdoman kita sa buhing matuod nga wala kita masayud sa takna ug panahon. Sa panahon nga ang Dios moabot kanato mahimong ato siyang mahimamat diha sa:

1. Kamatayon busa kinahanglan nga mangandam kita. Live as if you will die tomorrow.

Kini ang rason nga angayan natong ihatag ang atong best sa pagkakaron kay ang ugma wala nay kasegurohan.

2. Sa atong isig ka ingon. Ang atong isig ka ingon mao man ang salamin sa atong Ginoo. Gani matud pa ni Ginoong Jesus, kun unsa ang inyong gihimo sa labing ubos sa akong mga igsuon mao usab ang inyong gibuhat ngari Kanako.

3. Sa mga sakramento angayan kitang andam ug mahinangpong modawat unta sa atong Ginoo. Nagpasabot lamang kini nga nahimo kitang mahinungdanon alang sa Dios tungod kay anaa man siya halos sa tanang episode sa atong kinabuhi.

4. Sa iyang ikaduhang pag-anhi. Ang pamaagi sa Dios lahi sa atong pamaagi. Ang iyang takna lahi sa atong takna. Ning paagiha nahimong daw kinahanglang mangandam kita.

Mahimong ang mga panghitabo karon sinugdanan pa lamang sa posibleng mahitabo alang kanato sa umaabot.

Ang uniberso padayong naglihok ug sa iyang paglihok mamahimong maapil ang atong kaugalingong planeta ug unya moabot ang himaya sa Dios aron kita pagahukman.

Nahinumdom nuon ko sa giingon ni San Benito sa Nursia nga bisan kun unsaon pa nato og likay sa Dios apan ang atong mga anghel nga magbalantay padayong mo report kun unsa man gani ang atong gihimo nga makapalagot sa Ginoo. Mao nga angayan lamang nga sa Iyang presensiya kita maanaa gayud.