Way grahe, dili maka sakyanan

Nindot ang balaudnon nga gisugyot ni Marinduque Congressman Lord Allan Jay Velasco nga kadtong gustong mopalit ug moparehistro og sakyanan kinahanglang dunay parkinganan.

Pinaagi niini, masulbad ang problema sa trapiko kay malikayan na man nga ang mga sakyanan anha ra iparking daplin sa karsada nga usahay makahasol sa traffic.

Sa balaudnon ni Kongresista Velasco, giila niya ang mga dapit nga nakasinati og problema sa trapiko kay daghang sakyanan nga naa ra gi-park sa karsada, naglakip sa Cebu City.

Ang uban niini mao ang mga siyudad sa Angeles, Bacolod, Baguio, Batangas, Cagayan de Oro, Dagupan, Davao, Iloilo, Naga sa Camarines Sur, Olongapo ug uban pa.

Apan tan-aw nako, sayon ra gihapon kini nga himoan og mga inantigong paagi sa mga gustong molapas sa balaod, kon ang mga tigpatuman sa balaod, lugak sa ilang katungdanan.

Kinahanglan gyud nga kadtong masakpan nga moparada sa ilang sakyanan sa karsada, ilabi na sa gabii, himoan og estrikto nga paagi sama sa pagpahamtang ug bug-at kaayong multa.

Tan-awa ra gud ang mga public utility vehicles, sama sa jeepney, bus, ug mga taxi, sa wa pa na gipangrehistro, ang mga tag-iya gipangitaan na og mga grahe.

Apan unsay nahitabo? Kay wa may grahe nga dako ang mga tag-iya alang sa daghan nilang sakyanan, ipadala nila sa mga driver ang unit, ug resulta? Anha ra iparking sa mga daplin sa karsada.

Kon may sunog, dugay tawon kaayo makalusot ang mga trak sa bombero ug daghan na nga hitabo nga nakadako na ang sunog kay nababagan man ang mga firetrucks.

Sa balaudnon ni Velasco nga bag-o pa nga gisang-at sa Kongreso, kadtong mga masakpan nga way grahe ug giparking ra ang sakyanan sa karsada, ang rehistro sa sakyanan i-revoke og tulo ka tuig ug multahan pa og P50,000.

* * *

Dinhi sa Cebu City, among gikampanyahan sa Cebu City Transportation Office ang mga mag-overnight parking sa karsada, ilabi na sa mga interior roads.

Kadtong mga sakyanan nga ma-clamp, multahan og P1,500 ug pabayaran pa nila ang mga pending nga violations nila nga narehistro sa Traffic Violations Bureau.

Tambag nako sa mga tag-iya’g sakyanan nga ayaw ninyo iparking sa karsada, pag-abang mo og lugar nga dili karsada, dili sab aseras.

Unya, kamong mga tag-iya sa mga heavy equipment nga gikontrata pagtrabaho sa mga karsada, ayaw ninyo iparking ang inyong units sa karsada, kay dili mosugot ang mayor niana.

Makabayad unya mo og multa, sama nianang naa gi-park sa may tungasan sa Lahug paingon sa Busay.