EDITORYAL - Magpakahilom gihapon?

Nabuhian og paglaum ang mga kaliwatan sa Sultan sa Sulu human gipaboran sa korte disto sa nasud sa France ang kasong ilang gisang-at batok sa Malaysia may kalabotan sa Sabah.

Ang korte mimando sa gobiyerno sa Malaysia pagbayad sa ilang abang nga mokabat og bilyones dolyares ngadto sa pamilya sa Sultan sa Sulu.

Ang pamilya gustong embarguhon ang mga national assets sa Malaysia nga naglakip sa Petronas, pinakadakong oil company sa maong nasud.

Pila na ka mga presidente ang nanglabay apan way bisan usa nga nagkainteres sa teritoryo sa Sabah nga iya sa Sultanate of Sulu , gawas lang sa kanhi  diktador, Ferdinand Marcos, amahan sa kasamtangang pangulo sa nasud.

Ang amahang Marcos gikatahong  misuway paghimo og military action aron pagbawi sa Sabah apan nabulilyaso.

Gihimakak niya kining tanan apan nahitabo ang Jabidah Massacre sa giingong mga Tausug, ang Malaysia pagkasayod sa plano sa Pilipinas gikatahong maoy naghatag og pundo sa gitukod nga Moro National Liberation Front nga giporma ni Nur Misuari.

Sagad  sa mga sakop sa unang MNLF mga kaliwat sa mga biktima sa Jabidah massacre nga gustong manimalos sa gobiyerno ug mobuwag ang Mindanao, samtang ang tumong sa Malaysia samukon ang Pilipinas aron di na makahigayon pagbawi sa Sabah.

Sa pagdagan sa panahon, nilambo ang Sabah kay mibubo og pundo ang Malaysia, samtang dinhi sa Pilipinas nilampos sila nga samukon ang Mindanao.

Di tanang kaliwatan sa Sultan sa Sulu niuyon sa MNLF kay alang kanila sila ang tinud-anay nga nanagiya sa Sabah, Palawan ug pipila ka bahin sa Mindanao.

Bisan sa pagpakahilom sa gobiyerno bahin sa ilang claim sa Sabah, gipadayun nila ang makutas, gastuso kaayong proseso sa international court.

Karon gipaboran sila sa korte, magpakahilom lang ba gihapon ang gobiyerno?

Unsaon nalang kun kining kaliwatan sa Sultan modeklarar nga mobuwag sa Pilipinas kun ihatag sa international court balik kanila ang Sabah?