EDITORYAL - Safety and health standards nasunod ba?

Makatarunganon ug makiangayon lang nga isipong usa ka krimen ang dili pagpakabana sa mga kompanya sa occupational safety and health standards law dinhi sa Pilipinas. Daghan na kaayong mga aksidente nga nanghitabo sa mga nagkadaiyang trabahoan, numero uno niini diha sa mga construction sites, diin dunay nangahulog, natabunan, nakuryentihan ug uban pa nga usahay moresulta sa tibuok kinabuhing pagkabalda o kamatayon sa trabahante.

Dili palang dugay, dunay nahitabong aksidente sa usa ka pabrika sa pagkaon diha sa Mandaue City human ang usa sa mga trabahante niini nga bag-ohay palang nakasulod sa maong trabaho ang nakaon sa makina.

Niadtong gubat sa Vietnam, mas daghan pa ang mga nakalas o naangol sa mga pabrika ug trabahoan didto sa Amerika itandi sa mga Amerikanong sundalo nga nakalas o naangol sa maong gubat.

Ang mga aksidente mapugngan kun ang mismong management seryuso nga naghunahuna para sa kaluwasan ug kaayohan sa ilang mga trabahante. Ang management mao ang tag-iya mismo sa gitukod nga mga building sa mga construction sites o tag-iya ba ron sa mga pabrika.

Kun pananglit magtihik-tihik sa gastos mapugos gyud og mao-mao ang mga construction firms o ba kaha mga department heads sa kompanya ug usahay anha masakripisyo ang safety sa trabahoan.

Kung andam mogasto ang management o ang tag-iya, dili lisod ang pagmuntar og mga safety measures (engineering designs), pagkuha og accredited, trained ug authorized safety officers, pagpalit og mga safety equipment sama sa personal protective equipment ug uban pa para sa matag usa empleyado.

Apan dinhi sa Pilipinas samtang tuod dunay mga kompanya nga hugot nga nipatuman og safety and health standards, duna gyuy mas daghan ang wala mosunod niini kay nagtinihik sa kwarta ang mga tagiya.

Makita kini bisan gani sa mga dagkong kompanya sa mga utilities (kuryente, komunikasyon, cable service, janitorial services) nga kuwang sa kagamitan ang ilang mga sakop samtang nagtrabaho. Kana palang daan mga trabahante nga walay kumpletong safety gears makonsiderar na kini nga kalapasan ug pagpabaya sa ilang mga kompanya. Busa, makatarunganon gyud nga himuon nang kriminal nga salaod ang pagpabaya sa mga kompanya sa safety sa ilang mga kawani, aning paagiha malikayan na ang mga walay kapuslanang pagkamatay sa mga skilled workers sa Pilipinas.