Unity sa pag-abli sa klase
Ambot wa ba lang magkasabot, o pulos ba lang nabag-ohan sa mas dagkong responsibilidad, o pulos lang gyod di andam sa pagduma sa tibuok nasud, o nagpatas-anay na sa pisi sa una pa lang nga mga adlaw sa ilang administrasyon, o igo lang nagpalabwanay pagkuha sa atensiyon sa publiko.
Kon wa pang kabantay si Bise Presidente Sara Duterte Carpio, gibalibag ni Presidente Ferdinand Marcos Jr. sa kinadul-an nga bintana sa Malakanyang ang iyang pangangkon nga aprubado nang iyang plano sa pagpamugos sa 100% nga face-to-face classes sugod karong Nobiyembre 2.
* * *
Sukwahi sa pasidaan ni Carpio, isip education secretary, nga wa nay eskuylahan nga tugotan mag-blended learning human karong Oktubre 31, si Marcos Jr. niingon nga magpadayon kini sa pipila ka mga lugar tungod sa mga limitasyon nga nataligam-an sa kalendaryo nga school year 2022-2023 nga gibandilyo na sa higanteng burukrasya sa Department of Education (DepEd):
• Kakuwang sa mga magtutudlo, classrooms, gadgets ug internet connection; ug
• Pagsulbong sa bag-ong mga kaso sa Covid-19 sa hapit tanang rehiyon sa Pilipinas tungod sa pagkatap sa mas mananakod nga subvariants sa Omicron.
* * *
Bisan sa iyang pagkasupalpal atubangan sa ubang mga sakop sa gabinete atol sa ilang tigom niadtong Martes, si Carpio wa pa mopakita og timaan sa kaandam pag-atiman sa kaliboan ug usa ka detalye nga kinahanglang hapsayon sa iyang pag-insistir nga pabalikon nang kapin sa 27 milyones ka estudyante sa mga eskuylahan sugod sa sunod buwan:
• Nisubli sa iyang lagda nga di mag-uniporme ang mga bata; ug
• Naghisgot og survey nga mayoriya ang nisuporta sa in-person classes.
* * *
Makatabang ni Carpio ang paghunong pagpasalig nga siya ang matuman ug pagsugod pagpaminaw sa mga mas nasuhito sa iyang departamento, sama ni DepEd Central Visayas Director Salustiano Jimenez, kinsa nisugyot nga:
• Usbon ang School Safety Assessment Tool (SSAT) sa DepEd nga nagsugo og usa ka metro ug tunga nga distansiya sa mga estudyante aron nga mas daghan sa 20 ka bata ang masud sa usa ka classroom; pero
• Kon kinahanglan gyod nga ipatuman ang physical distancing aron di magtinakdanay ang mga estudyante, kinahanglang buwagon sila og tulo ka shifts, una sa buntag, ikaduha sa hapon ug ikatulo sa gabii.
* * *
- Latest
