Newscoop padayong milambo

Human sa duha ka tuig nga way nahitabong general assembly tungod sa pandemya, malampuson nga napahigayon sa Cebu Newscoop ang ika-23 niini nga general assembly kagahapon. Nitambong isip pinasidungang dinapit ang representante sa Coop-Natcco Partylist nga si Kongresista Felimon Espares. Bisan sa mga hadla sa pagsuway tungod sa krisis milahutay ug padayon ang paglambo sa Newscoop.

Gikan sa dul-an sa 200 mil nga puhonan dihang unang gitukod ang kooperatiba 26 ka tuig na ang milabay, karon ang Newscoop usa na sa mga multi-million cooperatives sa nasud.

Gikan sa pipila lang ka buok nga miyembro niini, karon moabot na sa kapin sa 2 mil ang kinatibuk-ang membership sa Newscoop ug nagpadayon pa sa paglipang tungod sa pagbukas niini alang sa kumunidad.

Abli na ang Newscoop nga modawat og membro bisan dili sakop sa media. Ang pagtinabangay sa matag miyembro maoy hinungdan sa padayong paglambo niini inabagan sa maayong pagdumala sa mga sakop sa board pinangulohan ni Atty. Elias Espinoza ug sa management and staff.

Bisan sa pandemya mikita pa gihapon ang kooperatiba og nakabayad og debidendo sa tanang sakop niini.

Wala say membro nga mipauli nga way bitbit nga lima ka kilong bugas kagahapon.

Ang inantigo nga paggamit sa pundo sa membro maoy yawe nganong bisan sa krisis pabiling lig-on ang Newscoop.

Kabahin sa inantigo nga paggamit sa pundo mao ang pagbubo niini isip investment sa mga negosyo aron mokita og interest. Lakip sa investment sa Newscoop mao ang transportasyon ug punerarya ingon man realty.

Kanunay sab ang pagpautang og kwarta sa mga membro nga nagkinahanglan sa kubos nga interest.

Bisan puhonan sa negosyo mahimong makahuwam sa Newscoop.