Sa paagi nga atong gisud-ong ang palibot

Pinasikad sa Mt. 5;27-32

Matag usa dunay gigikanan. Ang matag gigikanan nato mao man ang sukaranan sa paagi nga atong pagahukman ug sud-ongon ang atong palibot.

Ang kasinatian ni Elias sa karaang panahon nahimong complete opposite sa atong panlantaw nga ang Dios kinahanglang mopadayag sa paagi nga mahimayaon.

Apan ang Dios mipadayag kang Elias diha sa kahilom ug sa malinawong huyohoy sa hangin.

Ang Dios wala diha sa linog ug uban pang kusog diha kalikupan. Malisud man ang panaw ni Elias ingon nga propeta sa Dios apan sa kaulahian nahimo siyang madaugon ug malampuson diha sa iyang pagpanalipod sa tinguha ni Yaweh gikan sa mga mapintas nga panglutos labina gyud ni Jezebel kadtong babaye nga nagdala og dimal sa kinabuhi ni Acab.

Ginaingon nga ang kasingkasing mao ang sentro sa kinabuhi sa matag tawo. Kini pinasikad sa panlantaw sa usa ka Judio.  Mao kini ang hinungdan kun nganong ang Ginoong Jesus nagkanayon nga ang bisan unsang mosulod sa lawas sa tawo dili makahugaw kaniya kondili ang mogawas gikan sa iyang baba.

Kini tungod kay gikan man kini sa iyang kasingkasing. Anaa sa kasingkasing nagkapundok ang mga pagbati mahimong limpiyo ug mahugaw.

Mao nga pulong nga mogawas sa matag baba mosalamin man sa matang sa tawo nga naghupot sa maong panlantaw.

Si Jesus nagpahinumdom nga kun imong gisud-ong ang usa ka babaye uban ang malaw-ay nga panghunahuna nan, nakapanapaw ka.

Kun ang kasuko nimo makapaaghat kanimo sa pag ngalan og boang sa imong isig ka ingon nan, angayan kang mahiagom sa silot sa impiyerno dili ingon nga kalayo lamang nga walay pagkapalong kondili ang kawalay kahigayonan nga makig-atubang sa Dios.

Lisud ning mga panahona karon, apan bisan pa man ning atong mga kasinatian karon padayon unta kitang maningkamot nga mas pilion nato ang positibong panlantaw kaysa negatibong pagbati.