Mokilaw og mga kidnapper

Upat ka mga Chinese nationals ang napatay atol sa gipahigayong rescue operation sa mga operatiba sa PNP Anti-Kidnapping Group (AKG) Visayas Field Unit ug sa kapolisan sa dakbayan sa Lapu-Lapu niadtong Mayo 25.

Naluwas sa mga otoridad ang 70-anyos ang usa ka negosyante nga usa usab ka Intsik kinsa daling nadala sa tambalanan ug nakagawas na human masuta nga ok na ang iyang panglawas.

Matud ni P/Lt. Zosimo Ravanes, ang team leader sa AKG VFU, nga agresibo kaayo ang mga kidnapper kinsa pulos mga armado ug miuna sa pagpamusil sa mga otoridad nga misangpot gani sa pagkaigo sa usa ka pulis. Maayo nalang kay nakasol-ob og bullet proof vest ug wala maunsa.

Wala usab mosanong ang mga kidnapper dihang gipasurender maong gibaslan nila og namatay kay sila pa ang madisgrasya.

Matud ni Ravanes nga mga sakop sa usa ka organized kidnap for ransom group ang mga suspek kinsa target nila ang mga sama nilang Chinese national nga biktimahon ug kong molampos na, tawagan nila ang pamilya nga toa sa China ug pangayoan dayon og ransom.

Ang kidnapping incident nahitabo sa Barangay Lahug apan gidala kini sa mga suspek didto sa dakbayan sa Lapu-Lapu.

Dili kini ang unang higayon kay duna nay mga nahaunang pagpangidnap niadtong Mayo 7 diin nadakpan ang duha ka nga Chinese nationals nga kidnapper ug naluwas usab ang biktima.

Bisan og pulos mga Chinese ang nalambigit sa kidnap apan makamugna kini og epekto sa peace and order sa atong dapit busa kinahanglan nga tutokan kini ug solbaron sa labing dali nga panahon.

Dautan tan-awon nga ang atong dapit ang himoong salag sa mga sindikatong Intsik, dinhi sila magsabwag sa ilang kadautan pinaagi sa pag unay og target sa ilang mga kadugo.

Posible baya nga duna pay mga nahauna nilang biktima ug wala lang mareport ug deretso mibayad sa ransom.

Kaniadto sa Manila ra man nato madunggan ang ingon niini nga balita. Apan ni-expand naman sila dri sa atoa kay nagtuo sila nga safe ra sila.Apan namatud-an nila nga mokilaw pud diay og mga kidnapper ang atong mga tinugyanan sa balaod maong napatyan sila.

Posibleng adunay mga kauban silang mga Pinoy nga nagsilbeng guide sa mga dapit. Ang akong gikahadlokan ani kong matakdan ang utok sa mga local nga dali ra diay ang pangwarta sa kidnapping mohimo ba usab sa samang krimen.

Karon pa lang kihanglan puhagon na sila aron dili matarug ang peace ang order nga mahinungdanon usab kaayo sa natad sa turismo nga usa sa gisaligan sa Sugbo labi na sa dakbayan sa Lapu-Lapu diin usa sa sentro sa turismo ug ubang komersyalismo.