Salikwaot kayo

Ang kadaugan ni Bongbong Marcos nagpasabot nga mosugot ra ang kapin sa 30 milyones ka Filipino nga dili bayaran sa mga Marcos ang ilang Estate Tax nga miabot na og P203 bilyones.

Pero para nako, angay gyud nga bayaran ni Bongbong ang obligasyon sa ilang pamilya nga pagbayad sa Estate Tax, kay manumpa ra ba gyud siya nga motuman sa tanang balaod dinhi sa Pilipinas.

Ang pagbayad og Estate Tax anaa man gyud sa Internal Revenue Code, ug mao nga salikwaot kaayong manumpa si Bongbong sa pagtuman sa balaod, unya dili siya mobayad sa obligasyon sa ilang pamilya.

Si Bongbong ug si mama niya Imelda Marcos maoy “court-approved” administrator sa ilang katigayonan ug mao nga sila maoy giawhag nga mobayad sa Estate Tax nga gilingiw-lingiwan ra nila suukad pa kaniadtong 1997.

Law-ay kaayo alang sa usa ka presidente nga mao unta ang magsilbi nga ehemplo apan siya na hinuon ang magpasunod sa katawhan nga dili bayaran ang Estate Tax.

Dili ba kaha siya makonsiyensya nga maghunahuna nga daghang tag-iya og kayutaan nga multahan tawon sa Bureau of Internal Revenue (BIR) kay wa dayon mobayad sa Estate Tax, unya siya nga presidente utro pa nga nakalapas sa balaod.

* * *

Dinhi sa Cebu City, awhagon na lang nako ang katawhan nga mga dumadapig sa Bando Osmena Pundok Kauswagan (BOPK) nga mosuporta na lang sa administrasyon ni Mayor-elect Mike Rama.

Kini aron nga sa mosunod nga tulo ka tuig, hapsay ang pagdumala ni Rama sa atong siyudad. Nasayod na kita nga ang nag-unang problema nga angay’ng hatagan og pagtagad sa administrasyon ni Rama mao ang basura, traffic ug ang paglunop.

Samtang nagtan-aw ko sa kasapaan nato dinhi sa Cebu City, nakita nako nga hilabihan na ka mabaw ug nanginahanglan na nga palawman aron nga dili na moawas ang tubig kon magbaha ug masakripisyo ang katawhan.

Sa administrasyon ni kanhi mayor Edgardo Labella napakyas kini pagsulbad sa paglunop kay ang mga magbaw na nga sapa wa man mahabwai sa mga lapok. Unsaon nga paglingkod ni Labella sa pagka mayor, miigo man dayon ang pandemic virus.

Unta, atol sa administrasyon ni Rama masulbad na unta niya ang mga nag-unang problema dinhi sa Cebu City. Hinuon, kini si Rama kon maglakaw ni sa lainlaing dapit sa siyudad, igmat kaayo ni’g mata nga makakita dayon sa angay’ng hatagan og aksyon.

Awhagon nako si Rama nga makighugoy-hugoy siya sa mga kapitan sa kabarangayan nga gihulagway nga kaalyado sa mga Osmeña, total layo pa kaayo ang eleksyon.