Custody sa illegitimate nga anak

Dear Atty. Divine,

Duna koy illegitimate nga anak nga karon 5 anyos na. Nagbuwag mi sa inahan sa bata ug atua kaniya ang among anak. Nag apply karon ang inahan aron motrabaho abroad. Gusto unta nako nga anha nako ang bata samtang nagtrabaho siya sa gawas. Ako siyang gisuwayan og hangyo apan di siya mosugot. Ang akong pangutana kun mamahimo ba nga ako ang mo-custody sa akong anak? Daghang salamat.

Mar

* * *

Dear Mar,

Basi sa Article 176 sa atong Family Code, ang inahan sa illegitimate nga bata mao gyud ang adunay parental authority ug dunay sole custody sa bata. Kini bisan pa kun ang inahan atua magtrabaho sa abroad kay ang physical absence sa inahan tungod sa iyang trabaho dili kana mamahimong basihan nga tangtangan siya sa iyang katungod sa pag-custody sa inyong 5 anyos nga anak. Sa ato pa, bisan kun modangop ka sa korte, dako ang posibilidad nga adto gyud gihapon ang korte mopabor sa inahan sa bata nga maoy mo-custody sa inyong anak. Basi sa mga nangaging desisyon sa Korte Suprema, ang inahan mamahimo lang nga matangtangan sa iyang parental authority or custody sa bata kun mapamatud-an sa korte nga unfit siya nga mo-custody sa bata tungod sa iyang pag-abandon sa bata, pag-abuso sa bata, pagka palahubog, og pagkagumon sa ginadiling drugas, o pagka immoral. Apan sa imo nga kaso, kun way susamang bisyo ang inahan sa bata maglisud gyud ka sa pagkuha sa custody niini. Hinuon aduna kay katungod nga mobisita sa bata isip amahan og obligado sab ikaw sa pagsuporta niini. Thank you and God Bless.

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.