Hunahunaa pag-ayo

Natinuod gyud ang pangagpas nga inig dayong biya ni Presidente Duterte sa katungdanan, ang utang sa Pilipinas sa mga langyaw’ng tigpahuwam, moabot na og dul-an sa P13 trilyones.

Ang usa ka milyon ka pesos, hapit usa ka dangaw ang gibag-on kon pulos tag P1,000. Kay ang P1 billion, usa ka libo man ka P1 million, sa ato pa ang P1 billion duha ni ka sakong kwartang tag P1,000.

Unya, kay ang P1 trilyon, usa ka libo man ka bilyon, sa ato pa dul-an sa 2,000 ka sakong kwartang tag nilibo ang usa ka trilyon ka pesos. Bali’g 10 ka 10-wheeler truck nga tag P1,000 ang usa ka trilyon ka pesos.

Nganong gihisgotan man nako ni? Kay ang utang sa Pilipinas karon gikan sa laing nasud, miabot na og P13 trillion.

Sa ato pa, kay 10 man ka 10-wheeler truck nga sinakong papel de bangkong tag P1,000 ang P1 trillion, ang utang sa nasud bali’g 130 ka 10-wheeler truck nga pulos tag P1,000.

Sus, kon mosipyat kita pagpili og tawo nga himoon natong presidente, mahimong mangamatay na lang ang atong mga apo, dili pa mabayran ang maong utang ug magtubo pa kini, ilabi na kon kurakut nga opisyal ang inyong pilion pagka presidente.

Dili ko mohatag ninyo og ideya kon kinsa ang inyong botohan pagka presidente karong Lunes, apan palihug lang, pilia ang tawo nga motuman sa balaod, dili kurakut, ug andam mobayad og buhis.

Law-ay kaayo nga kitang mga yano nga mga tawo, nagbayad gani og buhis gikan sa atong sweldo pinaagi sa withholding tax, apan dunay kandidato pagka presidente nga gilingiw-lingiwan lang ang iyang obligasyon sa BIR.

Ako gani, nibayad ko’g multa sa BIR kay wa dayon makapa-imprinta og resibo sa gamay nakong business, nibayad ko’g buhis sa akong negosyo, apan diay tawo nga magpapili pagka presidente nga dili mobayad og Estate Tax.

Kini ba nga klase sa tawo ang inyong gustong mahimong lider sa nasud? Mosugot ra ba mo nga kita magsanuoy pagbayad og buhis apan ang gusto ninyong mahimong presidente dili mobayad?

Palihug, hinuktuki pag-ayo ug ayaw dayon padala sa bul-og sa mga propaganda bahin sa kasikat sa usa ka kandidato.

Usbon nako, ang usa ka maayong lider kinahanglang matinumanon sa balaod, dili corrupt, ug dunay mga maayong ideya unsaon pagpalambo ang atong nasud.

Kinahanglang gamiton nato ang atong sagradong gahum sa pagpili og lider, mao nga karong Lunes, ayaw pagpasagad sa pagbotar kay anaa sa imong mga kamot ang kaugmaon sa nasud.