Pagka masokista sa mga Durano
Ang mga paningkamot nilang kanhi Tourism Secretary Ace Durano ug ubang batan-ong mga Durano sa pagpapas sa karaang imahe sa ilang pamilya–pagka loyalista sa diktadurang Marcos ug way pupanagana nga pagamit og puwersa batok ni bisan kinsang mangahas pagsukol sa ilang distrito–nakaangkon og pasiunang kalamposan.
Nabantang ni dihang gihangop sa mga sektor nga nagpakabana para sa tarung nga panggobiyerno–apil nang mga aktibista nga nakigbisog batok sa diktadura–ang kandidatura ni Ace pagka gobernador sa Sugbo. Pero nahugno ra sab dayon ang bisan unsang panghinaot nga si Ace lahi sa iyang katiguwangan.
* * *
Gawas nga nabanhaw ang karaang dagway sa mga Durano, napun-an pa gyod og bag-ong depekto nga unang nitumaw sa piniliay sa 2019 pero mas naklaro karong tuiga: Ang ilang pagka masokista.
Bisan gipakauwawan na sila–giisnab sa kalihokan sa ilang mga paryente nga silang Presidente Duterte ug Davao City Mayor Sara Duterte Carpio, gawas nga gihasi ug gipriso ang ilang mga lider sa politika–pabilin silang niduko ug nagpaawot. Lahi ni anhing Fernando Poe Jr. nga nidaog human nagpakulata sa iyang mga pelikula, ang mga Durano naparot na sa ilang liderato sa ikalimang distrito.
* * *
Pero ang tinuod mao nga wa silay kapilian. Bisan sa gibatokan sa mga Duterte ug bisan gibasura nang Ferdinand Marcos Jr. ang gibalikbalik sa mga Durano nga talagsaong kasuod sa ilang mga pamilya sukad pa nilang Ramon Durano Sr. ug Ferdinand Marcos Sr., kinahanglang pabilin nga moluhod sa administrasyon.
Kay ang alternatibo mao ang paghukas sa ilang kaugalingon sa pagpanghasi nga di nila masagang. Kon mobatok silang Marcos ug Duterte, mahimong iparonda ug paninglan sa karaan ug bag-o nilang mga atraso.
* * *
Bisan sa makauuwaw nga paghiku-hiko ni Ace, labi na sa peke niyang pagpalaom sa mga dumadapig ni Bise Presidente Leni Robredo, siya gihapon ang akong pilion pagka gobernador sa Sugbo. Kay makabotar man ko sa probinsiya isip rehistradong botante sa Pagsabungan, Mandaue City.
Ang nangalisbo nga bagahe sa iyang pamilya nalabwan sa maayo niyang track record sa Department of Tourism, sa pagpangonsulta sa mga Sugbuanon sa pag-umol sa iyang plataporma, sa pagpasalig nga palambuon pagbalik ang provincial hospitals ug sa pagpatigbabaw sa siyensiya sa pagduma sa pandemya.
* * *
- Latest
