Malisod man ang gisangon

Nahinumdom ko nga niadtong gihimo pang parokya ang San Pedro Calungsod sa Mohon, Sogod, nagsagol ang akong gibati. Una, tungod kay malisod kini himoon labina kun maghisgot ta og pagtukod. Ikaduha, dili pa husto ug paigo ang akong kasinatian.

Apan ang maong mga kaguol ug kahingawa nahupay sa dihang ang akong Tatay nga pari (sa Catmon siya ang among ama ama kuyog sa akong mga pais nga silang Padre Jonald ug Roger), siya si Sindulfo Iriarte.

Matud pa niya: “Ayaw guol kun nadestino ka dinhi. Una tungod kay layo ka dakbayan walay magsige og hasol nimo. Ikaduha, walay mangilog kun unsay naa nimo. Dili sila interesado niini kay gamay ra man!”

Apan ang pinakanindot niya nga gipamulong mao: “Dili tanang pari ang gihatagan og kahigayonan aron patukoron og parokya dodong mao nga espesyal ka! Dawata kini sa way igong pagbagulbol.”

Dunay degree of truth ang gipamulong ni Tatay. Sa iyang kapanahonan gani kuno lisud kaayo. Mahimo kang balhinon sa way igong pagpamilok. Gamhanan kaayo ang telegrama kaniadto.

Malisod man tuod ang pagkamasinugtanon apan sa laing bahin mamahimo kining makahuloganon labina kun makita mo ang Dios taliwala ning maong misyon.

Pragmatic ang bisan unsang institusyon karon. Ug gani ang maong pragmatism padayong naghatag og tanghaga sa mga kalihukan nga giisip makaluwas.

Apan sanglit gihigugma man nato ang Dios mao nga dawaton ang bisan unsa uban ang pagpaubos.