Komosyon sa Carbon

Gisakyan na pag-ayo sa politika ang isyu sa Carbon Market development. Kini maoy akong nakita taliwa sa gubot nga miulbo sa maong merkado sa niaging semana diin grabe nga nakarebenta ang mga vendors sa pagbutang sa mga railings duol sa ilang mga stalls.

Gani hagbay nga misawsaw ang politika niini. Gani mipasaka man si kanhi mayor Tomas Osmeña og kaso batok sa kasamtangan nga liderato sa City Hall pagpugong sa maong proyekto apan gibasura kini sa Office of the Ombudsman Visayas.

Apan ang kagubot sa niaging semana dili maayong tilimad-on sa relasyon tali sa lokal nga kagamhanan sa siyudad ug mismo sa mga gatusan ka vendor sa Carbon Market. Daghan ang nagduda nga kamot sa politika ang nagkutaw sa mga vendor nga kontra gayud sa maong proyekto.

Kay kon wala pa nanghilabot ang politika sa isyu sa modernisasyon sa Carbon Market, hapsay unta ang pagpatuman sa maong proyekto. Ug dili na unta mosangpot pa sa mga init nga panghitabo sama sa komosyon sa niaging semana.

Kay nganon man? Dako akong pagtuo nga gamay ra nga isyu ang pagbabag sa ubang vendor sa kalamboan sa labing dako nga pampubliko nga merkado sa dakbayan. Ug dali ra kini nga mahilot sa lokal nga pangagamhanan sa dakbayan.

Apan lagi kay gisakyan man sa kontra sa politika sa kasamtangan nga administrasyon, nayagaw na hinuon ang kamada. Dili kini maayo sa relasyon tali sa dakbayan ug mismo sa mga vendor nga nanginabuhi sulod sa maong merkado.

Siguro wala gayud hisabti sa ubang mga vendor nga ang pag-develop ug modernisasyon sa Carbon Market nagpasabot usab sa kalamboan sa ilang panginabuhian tungod kay daghan na man unya ang mo-patronize sa maong merkado.

Busa dili sila angay nga magpatunto sa kamot sa politika nga gustong mogahong kanila. Angay hinuon nilang hunahunaon nga sa mosugot sila’g sa dili moabot ra gayud ang pag-develop sa Carbon Market.