Ilad sa survey

Daghan ang nagduda sa kredibilidad niining mga political survey nga nanggawas karon dinhi sa dakbayan sa Sugbo taliwala niining nagsingabot nga eleksiyon sa Mayo, ilabina kon si kinsa ang modaug sa piniliay pagkamayor.

Kini tungod kay sa mga naggawas nga mga survey, dili pareha ang mga kandidato pagkamayor ang nag-una. Daghang na hinuon ang nagduda kon unsa gayud ang tumong niining maong mga survey duha ka bulan sa dili pa ang piniliay.

Sa survey nga giingong gihimo sa RP Mission and Development Foundation Inc. niadtong Marso 1, migawas nga leading candidate si Konsehal Dave Tumulak pagkamayor sa dakbayan sa Sugbo nga  nakakuha og 38 porsiyento.

Misunod kang Konsehal Tumulak si Mayor Michael Rama nga adunay 30 porsiyento samtang si kanhi konsehal Margot Osmeña nakakuha lamang og 25 porsiyento. Apan sa lain nga survey lahi nga kandidato usab ang nag-una.

Sa survey usab sa Pulse Philippine Survey kaniadtong Pebrero 21, migawas nga nag-una nga kandidto si Osmeña nga nakakuha og 46 porsiyento. Nagkumbati silang Rama (25 porsiyento) ug Tumulak (23 porsiyento) sa ikaduhang puwesto.

Ang labing kataw-anan mao ang laing survey nga nitumaw sa social media nga nagpakita nga si Margot nakakuha og 58 porsiyento. Gisundan siya ni Dave Tumulak (41.5 percent), ug Crisologo Saavedra (0.5 percent) samtang si Rama nagnegatibo.

Bitaw, dili kasaligan ang mga survey ilabina kung walay klaro ang tinubdan niini. Apan alang sa usa ka kandidato nga nanguna sa survey, dako kini nga bintaha kay mohimo kini og bandwagon effect. Kung ikaw ang nag-una sa survey, dako ang tsansa nga ang kinabag-an sa mga mga botante mobotar kanimo atol sa piniliay.

Sa ilang pagtuon, ang mga eksperto sa University of the Philippines (UP) School of Statistics nag-ingon nga ang publiko kinahanglan nga magbantay sa gitawag nga “street surveys” nga dili kasaligan tungod sa kakuwang sa pamaagi niini.