Gihimong laboratory

Nindot man nga tukion ang mga butang kalabot sa tinuohan labina kun mga batid sa teolohiya na ang mohisgot kalabot niini. Apan sa laing bahin, usa ka makuyaw nga panlantaw nga bisan gani ang nalatid nga balaod mahimong tuison lamang gumikan sa panabot nga ang tanan mahimo pinasikad sa tawhanong kalantip.

Sama pananglit sa niingon nga walay problema kun himoong pari na ang mga babaye apan dili pa lang karong panahona?

Ang mobalik sa pagsukna sa tradisyon nga gilatid sa nagkanayon: It should be Vir!” kun lalaki o man nga pagaordinahan. O dili ba kaha himoong balido ang Convivencia civil aron himoong “minyo” ang managsamang gender.

Dili  ako supak sa presensiya sa mga babaye sa simbahan ug gani nahimo man silang mahinungdanong kabahin alang niini. Maingon nga angayan lamang hatagan og igong pastoral care.

Mahimo silang panalanginan but not in the context of marriage apan mahimo silang panalanginan ingon nga tawo ug hinimo sumala sa dagway ug kasamahan sa Dios. Sa sinugdanan pa lamang daan sayud na sila sa limitasyon.

Dunay mga tawo lamang nga mohimo niining baruganan sa tinguha nga makapagawas sila sa ilang panahom. Ang lisod ini labina kun tuyoon og tuis ang bisan unsang nalatid nga balaod aron lamang pag accommodate sa gitawag nilang kausaban. Maingon nga daghang nahimong buta sa mga binuhatan sa ilang mga kandidato ug padayon gihapon sa pagsuporta nila nga nisalamin sa panghunahuna ug pagkatawo sa kadaghanang mga tawo nga nibotar kanila.

Ning panahona daghan sa mga tawo ang mosulti apan walay unod ni gahum ang ilang mga pulong. Ipaagi lamang nila og palagot sa kontra. Hinuon dili man tanan pud naghunahuna. Ug kun may hunahuna aw bolinaw.

Dili ako hingpit apan mas palabihon ko pang pilion ang tradisyon kay sa personal opinion. Matud pang Henry Ford nga ang sekreto sa pagdugay sa kaminyoon mao man ang pagka kontento sa naandang menu. Sama pud sa relihiyon aron siya mabuhi ug molungtad mao man ang pagpangita og paagi sa pag simplify sa iyang dogma sa walay pagpapaulipon sa hulhog ning kalibutan.

Dunay mga butang ug pagtulon-an nga absolute ug kay absolute man, dili kini mahimong usbon bisan gani sa atong Papa karon.