Piniliay sa Mayo 9 di kalingawan
Ang eleksiyon sa Mayo 9 karong tuiga di salida. Nga igo ra tang moabiba. Nga igo ra tang mobilib sa bida. Pero way himuon para niya. Nga igo ra tang masuko sa kontrabida. Pero moapil og kalingaw sa iyang pakatawa. Moapil gani og bilib sa iyang mga palusot.
Ang eleksiyon sa Mayo 9 di salida. Nga inigkahuman igo ra tang mobalik sa tinuod nga kinabuhi. Ang eleksiyon maoy motakda sa sunod nga hugna sa tinuod natong kinabuhi. Atong obligasyon ang pagpili sa tinuod nga mga bida ug pagbasura sa mga kontrabida.
* * *
Ang eleksiyon sa Mayo 9 di lumba. Nga igo ra tang mag-atang kinsa ang mag-una. Nga igo ra tang magsunudsunod kinsa ang gipakpakan sa atong mga kaila. Nga igo ra tang magtagna-tagna kon ang biya makaapas pa ba. Nga igo ra tang monunot kinsa ang popular aron pagsegurong makaapil og saulog sa kadaogan.
Ang eleksiyon sa Mayo 9 importante nga pagsukod. Nakat-on na ba sa nangaging kasaypanan. Naleksiyon na ba sa mga pangilad. Ug makapili na ba og mas tarung ug mas takos nga mga lider para sa umaabot.
* * *
Ang eleksiyon sa Mayo 9 di taphaw nga kontes. Nga ang mga mokanta ug mosayaw ra ang may kahigayonan sa pagdaog. Nga ang mga magpabaga ra atubangan sa katawhan ang makabentaha.
Ang eleksiyon kahigayonan sa pagpanghimbis. Kinsa ang labing ligdong ug labing takos. Di lang sa sulti kon dili sa agi. Di lang panindotay og jingle ug slogan. Kon dili palabwanay sa aktuwal nga pangalagad sa labing nagkinahanglan.
* * *
Ang eleksiyon sa Mayo karong tuiga di duwa. Nga ang labing maayo og taktika sa kampanya, labing adunahan nga mga magduduwa ug ang labing mat-an nga momaniobra sa mga lagda, maoy ma-koronahan.
Ang umaabot nga eleksiyon maoy magbuot unsay atong ugma. Mahaw-as ba gikan sa lawom nga gahong nga ato karong nahulgan? O mosamot ba hinuon og katumpawak sa mas bangis nga kaalaotan? Tapuson na bang unom ka tuig sa pangabuso? O sumpayan og dugang katuigan sa katalagman? Hinaot nga di ipakisama ang katungod sa pagbotar sa duwa sa tsamba. Balaanon natong obligasyon ang pagseguro nga mas sanag ang ugma nga ikabilin para sa umaabot nga kaliwatan.
* * *
- Latest
