Pagsawod mo’g tubig

Nalipay ko kay gamay na lang karon ang nangreklamo kabahin sa tubig nga gisuplay sa Metro Cebu Water District (MCWD) ngadto sa lainlaing dapit sa siyudad.

Makaingon ko nga maayo gyud ang pagkadumala sa MCWD Board nga gipangulohan ni Atty. Joey Daluz III, ug sa general manager sa MCWD nga si Engr. Stephen Yee.

Kaniadto atol sa lain pa nga mga sakop sa MCWD Board of Directors, gipasagdan ra gyud ang problema sa kanihit og tubig, apan karon giatiman na. Tiaw mo, ang among gripo diri sa bukid nga kaniadto mga pila ka tuig na nga wa mag-agas, moagas na panahon sa kaadlawon. Arang-arang na lang kini kon itandi kaniadtong lahi pa ang nagdumala sa MCWD nga maayo lang sa estorya, apan wa paminawa ang problema sa katawhan. Kami diri sa bukid, malipay na bisan og ang agas sa among gripo panahon lang sa kadlawon, kay duna man mi pundohanan sa tubig. Ingon sab unta niini ang himoon sa mga nagpuyo diha sa patag nga magpundo sila’g tubig aron nga kon mapawong ang ilang gripo, may magamit gihapon sila.

Dili unta sila magyawyaw kay gusto gyud nila nga sa tanang higayon moagas ang ilang mga gripo. Atol sa pagdumala nila ni Atty. Daluz sa MCWD, nag-abang sila og mga water tanker aron makahatud og tubig didto sa mga dapit nga way agas. Unya, karong bag-o, namalit sila og mga generator aron nga kon mapawong ang kuryente makaandar gihapon ang ilang mga water booster pumps ug makabuga og tubig ngadto sa mga gripo. Diri hinuon sa bukid, kami makatubig na gyud unta 24/7 kon mahuman na ang Lusaran-Busay Water Project nga nagpadayon pa sa pagmugna.

Salamat kaayo mga opisyal sa MCWD sa inyong maayo nga pagserbisyo sa katawhan nga nanginahanglan og tubig.

* * *

Hinay ba ang inyong internet? Reklamo kamo sa inyong internet provider kon dili sila makahatag ninyo og maayong serbisyo, ilabi na niadtong migamit og video live streaming.

Kadtong dunay mga Home Wifi nga naggamit og modem, sukda ninyo ang gikusgon sa inyong internet. I-speedtest, ug siguroa nga ang “PING” 1 or 2 ra gyud na. Kon ang “PING” taas kaayo, dili magkadungan ang tingog ug ang video, law-ay kaayo tan-awon. Kinahanglang awhagon ninyo ang inyong internet provider nga ibutang sa 1 or 2 ang PING. Daghan hinuon ang wa masayod kabahin niini. Kon dugay moatiman ang inyong service provider, ilisi na uy. Ang akong internet provider, maguba gani ang akong internet, nianang adlawa gyud dayon ayuhon nila, ug gisiguro pa nga ubos ang PING. Unta inyo kining nasabtan.