EDITORYAL - Pekeng tambal sa sari-sari stores

Higpitan na karon ang pagpamaligya og mga tambal tungod sa matud pa pagkuyanap sa daghang mga fake medicines nga napalit gikan aning mga gagmay’ng mga tindahan. Ingon ani gyud pirme, kinahanglan pang dunay mabiktima ayha pa moseryuso ang tanan pagpatuman sa mga balaod.

Ang Department of the Interior and Local Government miawhag sa mga local government units sa paghimo og ordinansa nga magdali sa mga sari-sari stores nga makabaligya og mga mga tambal.

Daan na mang dunay Republic Act No. 10918 o Philippine Pharmacy Act nga nagdili sa mga tindahan o bisan unsang establisamento nga mamaligya og mga medisina o tambal kun dili sila lisensyado sa Food and Drugs Administration.

Duna say Republic Act No. 8203 o  Special Law on Counterfeit Drugs nga hugot nga nagdili pagpamaligya o pagbaton og mga pekeng tambal.

Apan ngano mang duna may mga tindahang namaligya og mga tambal hangtud karon? Kini tungod kay nagpabaya man sab ang mga otoridad sa pagpatuman aning maong balaora. Ayha ra man sila molihok kun duna nay nahitabo o dunay reklamante. Kung wala gani, natulog ra ang balaod, nahimo silang reactive inay nga proactive sa ilang trabaho.

Hinuon kasagaran sa mga tambal nga ibaligya sa mga sari-sari stores kadto ra man sab mga over-the-counter drugs o kadtong dili na kinahanglan og reseta, sama kini mga paracetamol, haplas, sakit sa tiyan ug uban pa. Ang sari-sari stores usa sa mga kumon nga makita bisan asang suok sa mga komunidad.

Dako kaayo kini og tabang para sa mga molupyo tungod kay halos tanang gikinahanglan naa nila ug di na kinahanglang moadto pa sa merkado o groceries.

Apan kinahanglan pa ba gyung dunay lokal nga ordinansa para niini nga naa may balaod nga nagdili niining pagpamaligya og tambal sa mga tindahang dili otorisado sa FDA? Ang angay buhaton mao ang aktibong paglihok pagsigurong walay namaligya niini sa mga gagmay nga tindahan.

Tungod kay nagmika ra man ang mga lokal nga otoridad nagtuo lang sab ang mga pumapalit nga legal kini. Mao kini ang angay korihian.