Furniture company supplier og pagkaon?

Pito ka mga kapitan sa dakbayan sa Lapu-Lapu ang mipasaka og kaso batok ni Mayor Ahong Chan ug sa laing walo ka mga opisyal ug kawani sa City Hall ingon man upat ka mga pribadong tawo ug negosyante.

Ang  mga reklamante, pinangulohan ni ABC President Eduardo Cuizon, mipasangil ni Chan og mga kauban nga nahimo og anomaliya sa paggamit sa pundo sa gobyerno pinaagi sa pagsulod og kwestiyonable nga mga transaksiyon niadtong 2020 ug 2021.

Sigun sa pasangil, ang dakbayan sa Lapu-Lapu misud og kontrata sa Heritage  Muebles Mirabile Export, Inc., usa ka kompaniya sa furniture, aron pagsupply og mga pagkaon ug relief items alang sa mga biktima sa katalagman ingon man alang sa COVID-19 facility sa dakbayan.

Ang kinatibuk-ang kontrata nga nahatag sa Lapu-Lapu ngadto sa maong kompaniya mobalor og P47 milyones.

Unsa mang hitaboa nga ang namaligya og furniture mao may midaog og bidding pagsupply og relief goods ug pagkaon?

Kun atong tamdan ang reklamo sa mga kapitan matubag ang maong pangutana. Posibling dunay tinunto sa pagpahigayon sa bidding o ba kaha gituyo aron paburan ang usa ka kompaniya.

Sigun sa reklamo, ang usa sa mga nanag-iya sa kompaniya nga nakadaog sa bidding mao diay ang negosyante nga si Charles Lim, ang bana ni Sunshine Lim nga maoy pangulo sa tourism ug historical commission sa Lapu-Lapu.

Mahimong kabahin sa politika ang pagsang-at sa reklamo sa mga kapitan sanglit sila nailang mga kaalyado ni Congresswoman Paz Radaza nga maoy atbang ni Chan pagkamayor sa umaabot eleksiyon.

Apan di sab mahimong ibaliwa ang reklamo tungod lang kay posibleng kabahin ni sa pamolitika, sanglit tataw ang mga basihanan sa pasangil.

Atong paabuton unsaon pagpasabot ni Chan ug sa iyang mga kaubang respondent sa kaso nganong ang supplier og furniture nga gipanag-iya sa bana sa usa sa iyang mga tinudlong opisyal sa dakbayan maoy nidaog pagsupply og mga pagkaon?

Ug mas maayo unta og nagbaton si Lim og delikadeza pinaagi sa wala pagpasalmot sa kompaniya sa iyang bana aron malikayan ang mga pagduda nga gitiyopi ang bidding.

Si Chan ug Lim ingon man ang ubang mga nalakip sa kaso wala pa mohatag sa ilang tubag.

Matud nila wala pa sila makadawat og kopya sa reklamo.