Gakos sa katungod?

(Katapusan)

Kining maong isyu sa bakuna nagpasabot lamang sa lahi nga kinaiya kanatong mga Pilipino. Nga dali ra kitang morebenta sa mga palisiya sa kagamhanan nga sa atong tan-aw makabalda sa atong panglihoklihok.

Daghan ang nag-ingon nga tungod kini sa kakulang og disiplina natong mga Pilipino, nga mao usab ang hinungdan ngano nga hangtod karon maglisod gihapon pag-asenso ang atong nasud.

Gani, ultimong pagsunod sa mga lagda sa trapiko ug paghipos sa basura lisod pa nato nga sundon dinhi sa atong nasud. Dili man siguro tungod kay hugawan kitang pagkatawo kay naila na kitang mga Pilipino nga mga limpiyado.

Apan nganong kon moadto kita sa laing nasud, nganong dali ra man kita makasunod sa mga lagda sa trapiko ug paghipos sa basura didto? Nganong dinhi mismo sa atong nasud magpagoryogoryo man hinuon kita pagsunod sa mga palisiya?

Siyempre, didto sa laing nasud mahadlok kita molapas sa mga lagda didto kay lagi mahadlok mapriso ug papaulion dinhi sa Pilipinas. Ang resulta, mawad-an na hinuon og trabaho ug wala nay ikasuporta sa pamilya.

Dinhi makita nato ang dakong kalainan. Sa ubang nasud mahadlok kita nga molapas sa mga palisiya didto apan dinhi sa Pilipinas dali kitang makaprotesta kay aron lagi isiyaok ang atong katungod.

No wonder, dato sila didto ubang nasud, kita padayong nalugmok sa kalisod dinhi sa Pilipinas. Ug nagpasabot lamang kini nga kulang gyud kitang mga Pilipino sa disiplina, ang nag-unang lamas alang sa kalamboan.

Insakto baya ang pangagpas sa uban nga ang naghinubrang kagawasan ug kakulang sa disiplina maoy hinungdan nganong dili gayud moasenso ang mga Pilipino. Hangtod nga dili nato usbon ang atong kinaiya, wala gyuy kalamboan nga mosakdap kanato.