EDITORYAL - Sirad-an ang tinubdan sa polusyon

Kinahanglan na tingaling pangsirad-an na ang mga dagko ug mga karaang coal-fired power plants nga nagprodyus og polusyon dinhi sa nasud.

Kini agi og tampo sa Pilipinas sa paninguha sa mga kanasuran nga mamenusan ang polusyon nga nakaingon sa pagtaas sa temperatura sa kalibotan.

Ang mga lider sa nagkadaiyang mga nasud atoa karon sa Glasgow sa United Kingdom alang sa COP26.

Nagtigum ang nagkalain-laing mga presidente sa mga nasud aron tukion ang pagpangita og pamaagi nga mapaubsan ang carbon emission sa kalibotan.

Ang polusyon gikan aning mga planta sa elektrisidad nga nigamit pa gihapon og coal o uling gikan sa mga minahan usa sa daghang kontribyutor sa pagsaka sa temperatura. Ang pagsaka sa temperatura mao sab ang hinungdan sa global warming o pag-init sa kalibotan. Kining global warming ang nakaingon sa climate change o pagusab-usab sa pattern klima.

Kining climate change maoy nakaingon sa pagabot sa wala sa tempo nga mga bagyo ug huwaw ug nakaapektar kini sa produksyon sa mga umahan, pangisdaan  ug  sa mga tawo.  Mameligro tuod ang suplay sa kuryente kun pangsirad-an kining mga plantaha apan kun ang gobiyerno mangita daan og alternatibong source sa enerhiya dili kini problema. Mahimong molusad og mga programa o mohatag og dagkong insentibo o ba kaha mopautang og puhonan ang gobiyerno ngadto sa mga power producers aron mobalhin sa renewable energy sources.

Libre ug dili mahurot ang enerhiya gikan sa solar, geothermal, hydropower, wind power, wave power ug daghan pang uban nga kinahanglan lang i-harness sa tawo.

Bisan bag-o o may mga pamaagi pagkontrol sa polusyon kining mga plantang nigamit gihapon og uling o fossil fuels, ang reyalidad, nagbugwak gihapon kini og aso ngadto sa kahanginan nga source sa polusyon.

Panahon na karon nga maghunahuna ang gobiyerno para sa kaugmaon sa mga mosunod nga henerasyon kay mas dako ug kadaut nga ibilin kining mga plantaha sa sunod nga henerasyon.

Kinahanglang dawaton sa Pilipinas nga wala nay lain pang labing maayong solusyon sa problema sa panginahanglan sa enerhiya kondili ang renewable energy ra gyud. Mas labing maayo gani kun may balaod nga magdili sa paggamit og fossil fuels ang mga planta sa kuryente.