Hinay si BBM sa Sugbo?

Halos moabot 200 ka behikulo ang miapil pagparada sa kadalanan sa siyudad sa Sugbo aron ipakita ilang suporta ni Bise Presidente Leni Robredo, kinsa molansar pagka-presidente sa Pilipinas sunod tuig. Pero wala kini magpasabot nga si Leni mao nay kinakusogang kandidato nga paluyohan sa kinadaghanang botante.

Base sa mga dumadapig ni Leni, sa sinugdanan diyotay ra kunong sakyanan ang ilang gipaabot nga mokuyog tungod sa makuyaw’ng pandemiya nga atong giatubang karon.

Usab, angay sundon ang gikasabotang 20 lamang kutob ka behikulo ang pasalmoton sa maong caravan.

Apan wala kini matuman. Matud pa, samtang nagdagan na, nagkaanam kadaghan ang sakyanang miapil paglinya nga gikan kuno sa nagkalainlaing hut-ong sa katilingban.

Diin, imbes badlungon sa tigpasiugda sa maong kalihokan, ilaha pang gikalipay ug gipanghambog nga tin-aw kuno kining timaan nga ang mga Sugboanon gikapoy na sa kasamtangang namunoan sa nasud.

Unya, may dumadapig pang mikomparar sa nakuhang botos nila ni Bongbong Marcos (BBM) ug Leni Robredo niadtong 2016 national election, diin sa ilang paglansar pagka-bise presidente, si Leni nakahakot og 570,530 botos samtang si Bongbong Marcos (BBM) nakapupo lang og 190,564 dinhi sa Sugbo.

Pangutana: Sa hapit na mo-unom ka tuig nga pagka-bise presidente ni Leni, unsay kaayohan nga iyang napundar sa atong nasod? May natabang ba siya pagsumpo sa War on Drugs and Corruption program ni Presidente Rodrigo Duterte, o misige hinuog kontra? Usab, sa Build Build Build projects ni Duterte, aduna bay natampo si Leni?

Sa actual surveys nga gipasiugdahan sa nagkalainlaing independenteng grupo didto sa kaulohan ug sa laing kanasuran, pirmeng mag-number one si BBM samtang si Leni nangiwit.

Ang nahisgotang surveys dili matikas. Sanglit, may kamera mang pirmeng nagsunod sa nag-survey ug sa mga gi-survey.

Dinhi sa Sugbo, tungod sa gahom sa social media, daghan nang nakaila sa tinuoray’ng kinaiya ni Leni ug BBM. Ubay-ubay na ang sa hilom, nakadayeg ni BBM. Hasta mga OFW (Sugboanon man o dili), mayoridad nila BBM pod.

Sila daghag igsuon, paryente o pamilya nga gibuhi dinhi sa ato. Kon kinsang kandidatoha ilang paluyohan, segurado, mao poy botaran sa ilang kasangkayan.

Kini igo nang makahatag ideya kon ang kandidatura ni BBM sa Sugbo, hinay ba?