Mas maayo na lang kay sa wala

Nakaani og managlahing reaksyon ang sugyot sa simbahan ngadto sa lokal nga kagamhanan sa dakbayan sa Sugbo nga buksan ang mga sementeryo sa Nobiyembre uno ug dos apan ubos sa mga kondisyones nga ilang gilatag.

Nag-una niini mao ang pagtugot sa mga fully vaccinated individuals nga mao ray makasulod sa sam-ang atol sa adlaw sa mga santos ug mga patay.

Gihangop kini sa Emergency Operation Center kon EOC kay dako kuno og matabang dili lang sa pagkontrolar sa gidaghanon sa mga tawo nga modagsa sa mga sementeryo apan makatabang usab sa pagdasig sa mga tawo nga magpabakuna na aron makaduaw sa ilang mga mahal sa kinabuhi.

Hinuon ang desisyon anaa sa kamot sa LGU o sa mayor nga niining panahona si acting Mayor Mike Rama ang moitsa sa bola kong aprobahan ba o dili ang rekomendasyon.

Molansad ra ba siya sa 2022 eleksiyon basin naay masilo ug maapektohan ang iyang boto. Pero dili siya angayan mahingawa kong ang kaayohan sa mga tawo ang iyang basehan sa pagpatuman og lagda panahon sa Kalagkalag.

Seguro moingon ang uban nga unfair ang maong lakang niadtong mga wala mabakunahi. Apan kong atong tan-awon mas maayo baya ni itandi sa ubang mga LGU kay sirad-an man gyud ang sementeryo sugod Oktobre 30 hangtod na sa Nobiembre 2 sama sa dakbayan sa Lapu-Lapu.

Kong kadtong mga bakunado lang ang tugotan nga makasulod sa sam-ang at least naay representante sa pamilya nga makaduaw kay sa isirado gyud ang sementeryo nga walay si bisan kinsa nga masulod ug makadagkot man lang og kandila sa lubong sa mahal sa kinabuhi.

Ang uban moingon nga mas maayong sirad-an nalang aron patas tanan, para nako hinangol ra sad na kay magmingaw gyud ang sementeryo bisan pagdagkot dili na mahimo kong sirad-an gyud.

Tinuod nga dili pinugsanay ang bakuna apan nahulog na karon sa wala say balibaray kay adunay mga gusto natong himoon nga dili na pwede natong buhaton kay gamiton naman sa uban ang bakuna aron mapugos ang mga tawo sa ilang gusto.

Pero kong tugotan ang mga bakunado nga mosulod sa sementeryo makaseguro ba ta nga gamay ra ang mosulod? Basin baya makuratan ang mga otoridad nga midagsa ang mga tawo sa sam-ang kay daghan na ang nabakunahan, usa na sa pagatan-awon.

Atangan nalang nato kong unsa gyud ang pinal nga lagda sa adlaw sa minatay, apan mas maayong mo una nalang og duaw sa menteryo aron walay labad sa ulo mosabot ra na ang atong mga mahal sa kinabuhi tungod sa sitwasyon karon.

Dili pud na sila gustong mabutang kita sa peligro.