EDITORYAL - Pagpili og Presidente

Dunay unom ka mga kandidato sa pagka-presidente sa nasud karon, base sa mga nakaduso na og certificates of candidacies (COCs) ngadto sa Comelec kutob Oktubre 8.

Apan gipaabot nga posibleng may kausaban pang mahitabo tungod kay kutob pa sa Nobiyembre 15 mahimong mag-substitution.

Sa substitution, mahimong ang niduso og COC dili nalang mopadayon ug magpapuli og laing kandidato bisan unsa pa iyang rason apan ang tawong mopuli kauban ra sa ilang partido ug ilaha nominado.

Gani, ang substitute o mopuli mahimong adto na moduso sa iyang sertipiko de kandidatora hangtud sa udtong tutok sa adlaw gyud mismo sa pagbotar.

Ang mga kandidatong independente kung moatras, dili na mahimong mapulihan og laing kandidato.

Sa patak-op sa adlaw sa pagduso sa kandidatora niadtong Oktubre 8, duna unom ka mga kandidatong nagpapili pagka-pangulo sa nasud, sila mao si Vice Presidente Leni Robredo, Manila Mayor Isko Moreno Dumagoso; Senador Bato Dela Rosa; Senador Panfilo Lacson; Senador Manny Pacquiao ug kanhi senador Ferdinand “Bongbong” Marcos.

Gipaabot nga sa dili pa ang Nobiyembre 15 dunay mga kandidatong mo-withdraw ug pulihan kini sa laing sakop sa ilang partido o kowalisyon. Estratehiya kini aron makakuha pa og dugang simpatiya o suporta gikan sa mga botante.

Apan sa pagpili unya sa kandidato sa pagka-presidente sa nasud, dili unta kalimtan sa katawhan ang ilang responsibilidad isip usa ka Pilipino nga mopili og kandidatong labing maayo para sa kaugmaon sa nasud ug sa tanang namuyo niini.

Kun si anhing Senador Miriam Santiago pa maoy pasultihon, ang pilion presidente sa nasud dili janitor o ba kaha manager lang og kompanya.

Kinahanglang dunay katakos, adunay saktong edukasyon, background sa responsibilidad nga sudlan, dunay pagtan-aw sa kaugmaon sa nasud ug sa mga Pilipino ug labaw sa tanan may paghigugma sa nasud ug sa katawhan niini.

Nakat-on na unta ang katawhan sa mga leksyon gikan niining pandemiya ug gamiton kini aron basihan sa pagpili kun kinsa gyuy angayan nga mamahimong lider sa nasud ug dili kadtong bulsa maoy siguraduhong mapuno samtang naglingkod.

Dili kinahanglang sikat, basta ang importante dunay agi ug dunay kasingkasing para moserbisyo.