Di makapili kay mahimong mamatay
Tungod sa tambag sa mas suhitong mga higala, nihukom ang akong asawa nga imbes sa naandang delata lutoan og mas himsog nga pagkaon ang among itoy, nga gianggaan og Sibby sunod sa among digital platform nga SibyaTV (tawgon lang sa tibuok ngan nga Sibya kon magpabadlong).
Nalipay mi nga ganadong nikaon ug nahurot ni Sibby ang unang putahe nga ginaling nga karne ug utanon. Naglaom ming matinuod ang pasalig sa among mga higala nga maibanan ang iyang pangatol. Gipasidan-an hinuon ming tungod sa kabaga sa iyang balhibo di kalikayan nga mangutkot.
* * *
Nagsabot mi sa akong asawa nga di hatagan si Sibby og laing pagkaon gawas lang sa ginagmay’ng treats kon motuman sa mga lagda nga among gisuway og tudlo. Aron magtultol si Sibby sa iyang schedule sa pagkaon ug aron di mangayo samtang mangaon mi.
Pero naglumba mi og kalumoy dihang naghangad-hangad siya sa pagkatimaho sa alisngaw sa mga gipangluto sa akong asawa sa pamahaw. Ang ginagmayng kusi sa bacon ug itlog gisundan sa gagmay pero mas daghang hiwa sa adobo, humba, torta ug ubang paborito namong mga putahe.
* * *
Didto nagsugod ang iyang bisyo: Di na molingi sa iyang naandang pagkaon. Magpaabot siya sa mas lami nga ihungit sa akong asawa kon mangaon na mi. May mga higayon nga mapugos mi og basura sa iyang pagkaon nga di matandog.
Kon molampos mi sa paglingiw ug makalikay sa paghatag niya sa among panihapon, kay kinsa mang kasingkasing ang di matunaw nga magtan-aw sa itoy nga naghangad sa imong giingkib nga chorizo, mapugos siya og tiwas sa iyang kaugalingong pagkaon.
* * *
Pasayloang kasipat ni Sibby ang akong nahunahunaan dihang nagmingaw ang vaccination sites kay nagpili nang mga tawo sa mga bakuna sa COVID-19. Di sila mahimong lingiw-lingiwan hangtod mapugos pagpabakuna sa Sinovac kay wa nay lain. Samtang si Sibby magutman og kadiyot, mahimong mamatay sila kon malangayng bakuna.
Hinaot nga angkunon ang problema. Aron mahatagan dayon og sulbad. Sama sa mas mamugnaong mga lakang pagtanyag og mga benepisyo sa mga magpabakuna ug paghimong mas lisod sa kinabuhi sa mga di magpabakuna. Pero mahimo sang dapatan sa mas epektibong mga bakuna kon may igong suplay.
- Latest
