Walay labaw o ubos

Sa iyang pakigpulong sa United Nations Assembly, misaad si Presidente Duterte nga iyang taralon sa hukmanan kadtong nakalapas sa lagda sa kampanya batok sa ilegal nga druga. Gimandoan sa Presidente ang Department of Justice sa pagrepaso sa pagpahigayon sa maong kampanya batok druga.  Daw nagnokos-nokos ang Presidente.  Sa una, iyang giduphan ang kapolisan sa ilang mga kalapasan.  Hinaut nga tinud-on sa Presidente kining iyang saad, kay ginaingon baya nga “Walay labaw sa balaod, ug walay ubos niini, ug dili usab kinahanglan nga mangayo kita’g pagtugot kon ipatuman ug ipahamtang nato ang balaod ni bisan kinsa”.  Olraayt!

Ka-usikan maoy nakapugong

Nasayran nga adunay balor 550 milyones ka pesos nga COVID-19 kits nga napalit sa kagamhanan nga wala magamit ug nahupas na lang bisan sa dakong panginahanglan nga matestingan kadtong gituohan nga nataptan sa coronavirus.  Naalkansi usab ang gobyerno og dul-an 125 bilyones ka pesos tungod sa pagbayad sa hingpit sa mga COVID-19 test kits bisan kon kini hapit na mohupas.  Dayag kaayo ang ka-usikan sa gobyerno.  Apan magpasalamat gihapon kita sa Kahitas-an kay bisan sa kadaot nga nahimo sa kagamhanan, ang ka-usikan sa mga nagdumala maoy nakapugong mao’ng wala modako ang maong kadaot nga nahimo.  Madahaan!

Pildi’ng maglagot

Gitawag ni Senador Gordon si Presidente Duterte nga usa ka “BULLY” tungod sa pagkastigo sa Presidente sa senador ug sa gipahigayon’g imbestigasyon sa senado mahitungod sa giingong anomaloso’ng paggamit sa pundo alang sa pandemya. Angayan mokalma usab si Senador Gordon.  Bisan unsa pa’y iyang ihingalan sa Presidente, dili kini makapahunong sa naulahi sa iyang pagpanaway.  Dili kinahanglan nga insultohon mo ang ka-atbang aron lang pagpatunhay sa imong baruganan.  Ginaingon baya nga “Sa panaglantugi, kadtong kulang sa kaalam modangop na lang sa pagbugal-bugal”.  Pildi’ng maglagot!

Daghan pis, way order

Miawhag si Agriculture Secretary William Dar sa mga kagamhanan’g lokal nga paliton niini ang mga palay gikan sa mga mag-uuma sa tuyo nga masolusyonan ang nagkakubos nga presyo sa maong abot sa umahan.  Dili lang tingale isalig sa kagamhanang lokal ang solusyon.  Angayan usab repasohon o di ba kaha undangon na ang polisiya sa importasyon.  Kon saligan lang ang kagamhanang lokal, basin mahisama sa asoy sa usa ka gobernador nga sa dihang gipangutana sa kahimtang sa “peace and order” sa ilang lugar, mitubag lang nga, “Naay daghan “pis” (fish) apan wala’y “order”. Pagkatoytoy!

Dakong krimen

Matud pa ni DILG USec Jonathan Malaya, walay gihatag nga ayuda ang nasudnon’g kagamhanan ngadto sa mga pamilya nga apektado sa granular lockdown tungod kay wala usab mangayo ang hingtungdan nga kagamhanang lokal.  Morag nilutaw ang kakulang sa simpatiya sa atong nasudnong kagamhanan kinsa maoy mimando sa maong granular lockdown.  Katawhan ang nanginahanglan sa ayuda og dili ang lokal nga kagamhanan.  Angay mahibaw-an sa nangagamhanan nga “Ang kakulang sa pagpakabana maoy labing dakong krimen”.  Fezteleern!