EDITORYAL - Maypa'g eleksyon kada tuig

Siguradong karong mosunod nga mga adlaw magkadaghan gyud ang mga bag-ong ekipo sa mga kabarangayan, gikan sa mga sakyanan, garbage trucks, ambulansiya, tingali mini-firetrucks sab ug daghan pang mga kaayohan para sa ilang tagsa-tagsa ka mga konstituwente.

Apan makakatawa lang ang katawhan kay nganong karong panahona lang nga duol na ang pagkuha og certificate of candidacies sa mga kandidato sa umaabot nga eleksyon sa sunod tuig nanggawas kining maong mga proyektoha.

Ang mga kasamtangang magbabalaod, mga mayor, ug uban pa kalit-kalit lang nangugi pagkamanggihatagon, hatag og mga proyekto nga makabenepisyo ang katawhan, apan klaro kaayong pagpanguyab kini ngadto sa mga botante.

Wala nila kinia buhata sa dihang bag-ohay pa silang milingkod sa ilang pwesto. Apan karong taliabot na sab ang eleksyon sa 2022 kalit mao sila og kabuotan ug daghan na sila og nahunahunaang “kaayohan” para sa katawhan.

Dunay ubang nanghatag na og mga hinabang gamit ang linyang “tabang sa mga kabus nga nagkinahanglan ubos aning pandemiya sa Covid-19.”

Duna say uban, ang barangay officials gyud maoy giuna sa pagduol aron mohatag sa mga kinahanglanon kaayo nilang gamit ug ekipo sama sa trak sa basura, utility vehicles ug daghan pang uban.

Nakabentaha ang mga incumbent officials tungod kay mahimo man nilang gamiton sa ilang kaugalingong propaganda ang mga programang gitakda nang daan para sa mga tawo. Kini aron sila maoy mogawas nga nangugi pagatiman kunohay sa mga kabus.

Ang kwarta sa katawhan pingaagi sa buhis maoy gigamit sa ubang politiko aron magpahumot ngadto sa mga botante.

Sila na mismo maoy mangunay  pag implimentar sa mga proyektong daan na gyung  para gyud sa katawhan. Wala masayod ang mga tawo nga giilad lang sila aning ubang mga politiko.

Maayo tingali usbon nalang ang pamaagi sa eleksyon, himuon nalang kahang tags aka tuig ang termino sa mga elected leaders aron makita kun kinsa gyud nila ang tinud-anay motrabaho.

Mogawas nga padaghanay ug panindotay ang ilang buhaton aron matiman-an sila sa mga tawo ug botaran sa sunod nga eleksyon.

Aning paagiha mas daghang mabuhat sa mubo nilangg termino ang mgaa elected official ilabi na niadtong buot magpasubli sa posisyon.