Urom sa pagtiurok sa internet
Gitambagan ko sa mga suhito sa livestreaming, ang plataporma nga among gidangpan human napawong ang tanang regional stations sa ABS-CBN, nga ang bugtong paagi pagsagang sa di matag-an ug di mapugngan nga pagtibugsok sa internet connection mao ang pagpataod og linya sa tanang internet service providers (ISP).
Pero gipasidan-an sab ko nila nga way ISP nga perpekto. Nga way bisan usa nila nga sama kakusog sa ilang pangangkon ug kada usa nila mahimong mohagsa bisan unsang orasa. Gawas pa, wa na mi trabaho maong di kaabot sa tanang binuwan nga bayranan.
* * *
Kay tihik man ko, gipadayon ang kinabaratohan nga plan sa karaang ISP, ang kanhi SkyBroadband nga karon mao na ang Sky Fiber. Hangtod nga giingnan ko sa among viewers nga luspad kaayo ang akong nawong sa kamera ug sige og tibugsok ang akong signal.
Maong napugos ko pag-upgrade sa akong plan. Tuod man, ni-arang-arang ang katin-aw sa akong livestreaming ug wa na magsige og kaputol ang akong sibya. Pero may mga higayon gihapon nga molukapa ang signal ug di kabarog. Mao nga napugos ko pagpangita og mga alternatibo.
* * *
Gisuwayan dayon nako ang Dito kay naapil ang among lungsod sa ilang launch areas. Labihang kusoga sa pagsugod pero human sa pila ka semana, nilaylay ug wa nay kalainan sa ubang telco nga ilang gisaway.
Sunod nakong gisuwayan ang Gomo sa Globe. Dihang niabot ang ilang simpack nga akong gi-order online, labihang tuyhara sa signal sa Sky Fiber maong wa nako masuwayi. Hangtod nga uwahi na ang tanan.
* * *
Pagmata nako sa niaging kadlawon, patay ang Sky Fiber. Nidangop ko sa Dito pero wa na diay koy load. Ug di ko ka-load kon di ka-online. Wa ko ma-alarma kay sa kataposan masuwayan na gyod ang akong Gomo.
Pero di pa diay magamit ang Gomo kon di ma-download ang ilang app. Maayo na lang nga may load pa diay ang karaan nakong Globe. Naka-online tuod ko pero pwerteng kamanga. Wa mokihol ang akong download sa Gomo app ni ang akong pagpalit sa Dito promo. Kay uwahi na man ang pagtuman sa tambag sa mga suhito pagpakonektar sa tanang ISP, natug na lang ko og balik.
* * *
- Latest
