Dili tanan mahimong paminawon

Nindot man nga maminaw sa palibot ug gani kinahanglanon kini labina kun maghisgot kita og han-ay ug nindot nga resulta.

Apan sa laing bahin, dunay mga butang nga angayang i-ignore kun pasagdan. Mga butang nga imbis makapadasig, makapaluya ug makapagubot sa hunahuna.

Gitawag na sila og distractions ingon tang pulonga nga makahatag kanato og  kahasol ug uban pa.

Sa laing bahin, mahinungdanon kaayo nga pokus lang kita sa atong tumong ug tuyo.

Himoon nato kining tinguhaon aron sa ingon dili kita mamahimong mahisalaag sa atong mga damgo. Kini nagpasabot nga kinahanglanon nato ang C2 sa atong kinabuhi nga naglambigit ning mosunod:

1. Clarity sa atong mga tinguha ug tumong. Kun hanap pa sa diyes panas ang tanan nan, malisud alang kanato ang paggambalay sa mga laraw nga kanato makatabang sa atong kinabuhi.

2. Consistency bisan pa man sa mga kalisdanan. Padayon gihapon kita sa pagpaningkamot.

Bisan pa man sa mga kapakyasan padyon kita diha sa panlimbasog. Bisan pa man sa mga pagtamay padayon gihapon kita sa pagtaak sa dalan alang kanato.

Ning panahon sa pandemiya daghang mga kasayoran ang buot mosingit sa atong tagsa tagsa ka mga alimpatakan.

Ang resulta information overload. Ug kun dili kita maantigong mobahig niini kun unsay husto ug unsay dili nan, mamahimo kitang malibog sa hilabihan. Dili tanan paminawon kay ang uban kanila nagdala og sakit sa atong ulo.