Nagkasumpaking pangandoy

Kaha tingali kay gikapoy sa mga batikos sa iyang mga kritiko ug sa iyang pangedaron ang maong personahe nakahukom nga moretiro na lang.

Nganong iya mang pugson ang kaugalingon sa pagsulbad sa mga suliran nga kun buot hunahunaon anaa na sukad pa kaniadto.

Buot na gyud niyang magpakahilom ug mahinanok na lang nga malinawon. Malisod ang mga hitabo karon labina gyud ning mga panahona.

Apan talukahaw lamang buot na pud niyang mangalagad kay lagi dunay mga laraw niya alang sa kaayohan sa kinabag-an ang hangtud karon wala pay katumanan.

Ang pagtulon-an mao nga ayaw og latid og panahon ug mga lakang aron ingon kang epektibo diha sa imong pagpangulo.

Ang mga pangandoy nga padayong gihimong paon sa mga matuohon kang kansang pangisip talandugon ang padayong gitay-og sa mga bakak nga panaad.

Mga pulong nga nasuhong. Kun ang mga kabus nga katawhan padayong napagba sa hudno sa sulad sa malinlahong mga magbalantay, padayon pud nga mobutirik ang mga tiyan kanila nga padayong nisupsop daw mga alimatok sa kaugalinon nilang mga karnero. Ang mga karnero nga nahimong biktima mismo sa ilang giisip nga mga panalipod.

Ingon ini ang kalibotan karon. Ang budots maoy sukaranan sa maayong pagpangalagad.

Ang mga kaisipan nga padayong nahiloan sa mga pakatawang way hinungdan mao man ang sukaranan sa kaisipan.

Oo pipila lamang ang maantigong mo proseso sa mga hitabo. Kasagaran kun unsay Makita ug madungog mao man ang pagaisipon nga matuod.

Apan dunay mga tawo nga bisan ang matuod mahimong matuis. Walay laing kapaingnan ang daghan kondili ang paghangop sa kamatuoran ug kasayuran nga pinasikad sa mahan-ayong paggambalay aron usbon ang sistema dili alang sa kaayohan sa linupigan kondili bentaha alang sa mga malupigon. Apan ang sakit niini mao nga daghan kanato ang nahimong buta bungol ning hitaboa karon.

Ug kun nganong buta ug bungol?

Tingali kapoy na kaayo nga moanalisar sa mga hitabo. Kay buot nilang ipasundayag ug isilsil sa tayaon natong hunahuna nga wala na kamoy mahimo! Sinugdanan na aron sa dulom nga rehimen. Ug bugtong paglaum na lamang ang magsilbing kahayag sa atong pagpangakapkap sa kangitngit.