Air purifiers

Lainlain ang reaksyon sa katawhan sa kamandoan nga ang mga driver og bus nga magbiyahian sa kalungsuran, pasul-obon gyud og “air purifiers” kay kuno makatabang kini nga ang nagsul-ob niini dili matakdan og virus.

Dunay miingon nga kini pangwarta lang gyud sa mga opisyal ug tingali nakakomisyon sila sa mga tigbaligya niining maong kahimanan nga wa gyuy kapuslanan.

Dinhi sa Cebu City, duna sa’y awhag nga ang mga nagtrabaho sa mga balay patigayon nga gitugotang makaabli bisan og dia kita sa Modified Enhanced Community Quarantine, mas maayo kuno nga magsul-ob niini. Ang mga opisyal sa Department of Health wa man gani morekomendar nga ang katawhan pagamiton niini kay wa gyud kini scientific proof nga makatabang ni batok sa virus.

Nabalaka ko nga basin moabot ang higayon nga may mga opisyal nga mosugyot nga mamalit ang gobiyerno og air purifiers aron nga ipanghatag sa katawhan.

Kon tinuod pa nga kining mao nga mga kunohay air purifiers makatabang pagsanta nga dili kita matakboyan og virus, gisugyot na unta kini sa World Health Organizations?

Basta kay kon pugson gani kitang katawhan sa mga opisyal nga papaliton niining mga “air purifiers,” dili nato sila botohan kon magpapili sa umaabot nga eleksyon.

* * *

Diha sa mga police checkpoint, angay gyud nga dunay mokuha og temperature sa mga tawo nga moagi aron pagsuta kinsa kadtong mga gihilantan.

Apan ang gihimo karon sa kapolisan mao ra ang pagsuta sa mga rehistro sa mga motor ug lisensya sa mga tawo nga nagsakay niini. Mora’g tan-aw nako niini, wa gyud kaayo mapatuman ang pag-estar lang sa balay.

Basi sa Executive Order 137 nga giisyu para sa Cebu City, naglatid gyud nga pamultahon og P1,000 ang makasupak sa kamandoan, sama sa paglapas sa curfew, wa pagsul-ob og mask, ug wa motuman sa social distancing.

Matud ni Koronel Josefino Ligan nga maoy direktor sa Cebu City Police Office nga nagsaka ang gidaghanon sa mga nadakpan nila, ilabi na sa kabarangayan.

Unya, timan-i ninyo mga ginikanan nga kon ang inyong mga anak nga menor de edad, madakpan nga nakalapas sa lagda, sama sa pagsuroy-suroy, aw kamo maoy pamultahon.

Usa ka libo ka pesos ang multa sa mga makalapas sa lagda sa Executive Order 137 ug mga health protocols. Kon wa mo’y lakwon nga importante, pagpuyo na lang mo sa balay.

Ako bitaw, bisan og pwede ra gyud nga mogawas ko, apan usahay dili ra ko molakaw kay kuyaw na kaayo kon masugatan nimo ang mga tawo nga nagdala og virus.