Nganong magpakabuhi ang tawo?

Dunay tutulo ka mga hinungdan kun nganong nagpakabuhi ang tawo. kini naglangkob ning mosunod:

1. Ang tawo nagtinguha nga magmalipayon.

2. Tawag niya ang paghigugma

3. Tinguha niya nga sa Dios makighiusa.

Ang kalipay ingon nga panaw nagpasabot man nga matag adlaw ato kining pagapilion aron sa kaulahian kita magmalipayon. Wala kini magoasabot nga magpunay lang kita og katawa. Ang pagpunay og katawa nga walay hinungdan timailhan man nga sa pangisip kita malisoan.

Apan ang kalipay ingon nga panaw usa man ka dakong hagit sa matag usa. Ngano man? Tungod kay daghan ang babag sa maong tinguha. Usa na niini ang sayop nga panlantaw sa kalipay. Ang kalipay bisan pa man kun kinaugalingon apan wala man kini magpasabot nga kinahanglan nga ikaw mamahimong mapatuyangon. Ang paghimo sa ingon mao man ang makadala og kadaut dili lang sa imong kaugalingon kondili usab sa uban. Kalipay nga dili magdala og kadaut ngadto sa ubang mga tawo.

Ang sukaranan kun nganong anaa ang kalipay diha sa bisan unsang paningkamot ug panlimbasog mao man ang gugma.

Gugma maoy nakapahimo sa matag pag-antos nga makahuloganon. Gugma maoy magtukmod nato nga magsaulog sa kinabuhi taliwala sa kaayo niini. Ang paghigugma balaanon ug kining tanan atong gisuhid sa tinubdan nga mao ang Ginoo.

Sa katapusan ang tanang paningkamot ug panlimbasog ning dapit nga atong gibakasyonan mao man ang pagpangandam nato sa pakig-atubang sa Dios nga atong gisimba. Buot kita nga sa katapusang mga panahon unta kita mamahimong angayan nga mobarog sa iyang atubangan.