IATF protocol mas mimangtas

Human laparoha sa EO 17 ni Cebu Governor Gwen Garcia ang Inter-Agency Task Force (IATF), daw nakakitag mga aninipot, nangalipong ug wala na makaklaro hain ang hustong dalan nga maghatod ngadto sa gipangitang kadaogan batok sa COVID-19. Bisag gipasabot na sila nga ang EO 17 ni Garcia, makatabang kaayo sa mga manguliay’ng OFW/ROF ug sa atong gobiyerno atubangan ni Pres. Rodrigo Roa Duterte, si DOH Secretary Francisco Duque III, hugtanay nang mipakitag negatibong reaksiyon.

Sa EO 17, ang manguliayng Overseas Filipinos Workers ug Returning Overseas Filipinos, pag-abot pa lang nila sa Mactan Cebu International Airport, ipa-swab test dayon. Ug kon ang resulta ‘negative’ makauli gilayon ngadto sa ilang  mga gikamingawang minahal.

Samtang sa IATF, paestaron una’g 5 ka adlaw ang OFW/ROF sa hotel o quarantine facilities ug sa ika 6th day na ipa-swab. Dili ba, dakog deperensiya? Ultimong elementariyang bata, makakuwenta unsa ka hinay sa mathematics ang IATF.

Apan makapakurat. Kon kinsa ang hinay, mao pay gamhanan ug paboran sa Malakanyang. Resulta? Aw, natural! Tugob gyod sa kahuyang nga modesisyon. Ug kini gimatuod ni Duque ug sa IATF. Pastilan, nganong ipamugos man ang kapalpakan sa IATF? Nagpasabot ba kini nga bisag ang ipainom nga balaod sa IATF makahilo, kinahanglang imnon gyod sa mas intelihenting LGU?

Kaduha na momando ang Malakanyang nga ipa-divert ang tanang international flights sa MCIA aron lamang ipakita unsa kagamhanan ang IATF, kang kansang estilo namatud-ang depektoso. Sama ning bag-o nilang regulasiyon para sa manguliayng OFW/ROF. Matud ni Spokesperson Roque, imbes 10 ka adlaw silang ikuwarentina sa mga gitaganang hotel ug ubang pasilidad, gihimong 7  na lang.

Basta, kompleto nang nabakunahan sa pang-alkontra sa COVID-19. Apan kon didto sa gawas nabakunahan, dili puwede. Kinahanglan dinhi gyod sa Pilipinas. Haskang, hasola!

Ning gihimo sa IATF, sama rang nalipong sila human maigo sa EO 17 ni Garcia. Ug kay gustong ilhong hawod, mipandayg bag-ong balaud nga mas mangtas pa hinuon kay sa COVID-19. Balaod nga dili lang si Garcia ang gilatigo. Kondili, tanang Pilipino. Kini nagmatuod lang. Nga walay pagmahal ang IATF ug Malakanyang sa mga OFW/ROF, kinsa dako kaayog natabang sa pagbuhi sa atong ekonomiya sa Pilipinas. Pagka walay kaluoy!