Luha ug dugo sa nawalang adlaw

Nindot ang gisul-ob ni Miss Universe Philippines 2020 Rabiya Mateo pag-abot sa National Costume Competition nga didto himoa sa Seminole Hardrock Hotel, Hollywood, Florida, USA – ang sininang naglarawan sa atong Philippine national flag.

Matud ni Rabiya: “The blue color represents royalty, the red for the courage of an independent woman, and yellow for the color of the sun and stars which symbolize hope and freedom to choose whoever you want to be.”

Usab, pagrampa niya, gibalik kinig sulti sa commentator. Diin paghisgot og ‘yellow for the color of the sun…’ natagbaw’g pangita ang audience kon hain man ang ‘sun’? Nga miani og daghang latos ug batikos gikan sa mga insensitibong netizens ug fault finders, kinsa morag init mantika, mireak dayon human makadeparar sa maong sipyat.

Kahinumdoman, nga si Rabiya gilamok og grabeng pagsaway sa mga Diehard Duterte Supporters (DDS) dihang iyang gikontra ang pamahayag ni Presidente Rodrigo R. Duterte, kinsa miingon, nga ang mga babaye walay angay magpresidente kay ang nahuptan nilang emosiyon lahi ra sa mga lalaki.

Ning pagkontra niya sa gipamulong ni Duterte, mga DDS netizens nangasuko ug mibahad nga dili mosuporta ni Rabiya sa iyang damgo nga mahimong 2020 Miss Universe. Dakong posibilidad nga kining mga netizena mao ra usab ang misaway pag-ayo sa gisul-ob niyang Philippine flag-designed gown.

Hain kuno ang giingong adlaw? Mga hait yawyaw nga nakapahilak ni Rabiya, kinsa nangayog “sorry’’ sa tanang Pinoy dungan ang pagtug-an nganong nawala ang adlaw?

Diay, ang gibug-aton sa gisul-ob niyang gown, 45 kilos na daan. Unya ang koronang pormag adlaw, 15 kilos. Kon sumahon 60 kilos. Miprangka si Rabiya, nga dili niya kini madaog. Hinungdan, wala na lang isul-ob.

Gani, tungod sa kabug-at, midugo iyang tiil sa pagrampa niya. Sa grabeng paningkamot nga makahatag og impresibong wold performance nga dili malupig sa uban.

In fairness, bisan ang mga former Miss Universe maoy pahukmon, dapat mahiapil si Rabiya sa top 5. Pero, unsaon, dili man sila ang judges. Mga Latino man, kinsa namatikdang dili patas sa paghukom. Busa, kutob ra intawon sa top 21 si Rabiya.

Luha’g dugo tungod sa nawalang adlaw, iyang gipatulo. Pero, pilde gihapon ta, uy!