Higugmaa ang kaaway

Sukad sa paglibkas sa liquor ban sa Cebu City niadtong miaging semana, nabatyagan ni Mayor Edgardo Labella nga kadaghanan sa mga establisemiyento nga namaligya’g ilimnon’g makahubog nakatuman sa mga lagda sa pagpamaligya niini labi na sa social distancing. Apan alang sa akong higala, dako usab og natampo ang mga manginumay sa pagtuman sa lagda ug gihangop nila ang paglibkas sa liquor ban. Ginaingon nga ang ilimnon’g makahubog kaaway sa tawo apan ang bibliya nag-ingon man usab nga higugmaa ang imong kaaway.  Dili tingale makadaut ang pag-inom kay mas daghan pa man kuno ang mga tigulang nga palahubog kay sa mga tigulang nga doktor. Baya no!

PROMO ALANG SA BAKUNADO

Mihangyo ang konseho sa dakbayan sa Sugbo, pinaagi sa usa ka resolusyon, ngadto sa mga grocery stores ug uban’g business establishments sa paghatag og diskwento, mga pakapin ug uban pa’ng insentibo ngadto sa mga nabakunahan na nga kustomer agi ug pagdasig usab sa uban aron magpabakuna.  Senyales ba kini nga naglisod ang kagamhanan pagkumbinsir sa katawhan nga epektibo ug luwas ang bakuna batok COVID-19?

Ni’ng maong kampanya sa konseho, mahimo sila’ng mosagop og mga slogan sama sa “Ang bakunado, may diskwento” o ba kaha “Ang wa magpa-bakuna, wa magpalingla”.  Kulang pa kaayo ang suplay sa bakuna.  Angayan nga kini maoy tutokan.  Matud pa sa disclaimer, “Promo is good until supply lasts”. Saoonz!

MANAGSAMA ANG ISOG UG HANGGAW

Walay laraw si Presidente Duterte nga paatrason o pabiyaon ang mga barko sa Pilipinas gikan sa West Philippine Sea bisan sa nagpadayon nga presensya sa mga barko sa China sa maong kadagatan.

Miangkon si Presidente Duterte nga huyang ang atong pwersa kon itandi sa China apan andam siya mobuhis sa iyang kinabuhi niining iyang pagmakuli sa pagsibog.

Ginaingon nga “Ang kaisog, sama sa pagka-hanggaw, magtukmod sa tawo pagbuhat og gimbuhaton bisan makadaut kini kaniya.  Mao kini hinungdan ngano’ng lisod ug gubot ang pagkinabuhi”.  Daghan’g isog ug hanggaw sa kalibutan.  Paleho la!

INOT NGA LIMTANON

Usa ka 95 anyos nga ginang nga taga-Nueva Ecija giingon nga nawagtangan ug dul-an sa 15mil ka pesos human nga aksidente nga nasunog ang iyang pitaka samtang naglung-ag.

Ang maong hitabo nasayran na sa Bangko Sentral ng Pilipinas kinsa mipadayag sa lagda nga mahimo nilang ilisan ang nasunog nga kwarta kon aduna pa’y nahibilin niini nga sobra sa katunga.  Tungod ba kaha sa iyang pangedaron, nahimo na’ng limtanon si Lola. Kon dili siya matabangan sa BSP, sama ra si Lola nga nagtigom sa iyang kwarta sa alkansiyang buak.

Ang iyang kuwarta mipauli sa abog bisan dili kini gikan sa abog.  Dili mahimong dunganon pagbaton ang hiyas nga pagkalimtanon ug pagka-inot ug daginotan.  Fezteleern!