Patas lang unta

Gihatagan gyud og dakong pagtagad sa kagamhanan sa Dakbayan sa Sugbo ang mga tawo nga mag-bisekleta kay gipahimoan sila og “bicycle lane” nga anha sila moagi.

Nindot, kay makita man nga ang atong mga opisyal naglantaw sa kaayohan sa mga bicycle riders. Gitudlo si kanhi konsehal Gerry Carillo nga maoy mangulo sa maong programa.

Migasto ang kagamhanan sa siyudad pagpalit og daghang de-kolor nga gibutang daplin sa bike lanes aron nga dili kini gamiton sa mga four-wheel vehicles.

Ang mga sakyanan nga nasakpang giparking diha sa bike lanes, gi-clamp ang mga four wheels samtang gipang-alsa ang mga motor, ug gipamulta ang mga tag-iya.

Tan-aw nako, dunay nakalimtan ang grupo ni Carillo. Samtang estriktohon ang pagpatuman nga walay mamarking sa mga bike lanes, angay’ng estriktohon usab ang pagpanakop sa mga magbiseklita nga bisan “stop” ang traffic signal diha sa mga eskina, mopasutoy gihapon pagpadagan.

Makadaghan na ko mihisgot niini, apan mora’g gilingiw-lingiwan lang sa mga konsehal ug wala gyud sila moduso og ordinansahon kabahin niini.

Tingali nabalaka sila nga kon kinsa ang mosugyot niini, basin og kasuk-an sa mga tawo nga hilig magbisekleta ug maoy sagad mohimo sa maong kalapasan.

Gani si Mayor Edgar Labella misuspenso man sa pagpa-rehistro sa mga bisekleta, kay panahon pa lagi kuno sa pandemic.

Pero tan-aw nako, ang bayranan sa pagparehistro sa mga bisekleta, pwerte ra gyud nga baratoha ug dili mosangpot nga mamatay na sa kagutom ang hingtungdan.

Ambot og si Carillo dili ba kaha maglagot nga makakita sa mga magbisekleta nga bisan “Stop” ang traffic signal, mopaturatoy lang gihapon sa pagpadagan ug kuyaw kaayo nga sila madam-agan.

Kon madam-agan ang maong mga abusado nga seklista, sigurado nga makamugna sila’g problema sa nakadam-ag kanila.

Dili kaha sila magpabayad sa nakadam-ag kanila bisan ug nasayod sila nga ilang sayop nga sila nadam-agan?

Unta, masabtan ni Carillo ang akong punto ug isip maoy nagdumala niining programa sa siyudad, siya maoy mangunay pagduso og lakang aron mapitol na kining maong abuso nga gihimo sa mga seklista.

* * *

Kutob ra sa sulti ang pamahayag sa kapolisan nga hugtan nila paghimo’g kampanya ang mga illegal swertres dinhi sa siyudad, ug bisan na diha sa probinsya.

Dinhi sa siyudad pwerteng daghana pa gihapon sa mga yellow nga kahon nga anaa sa daplin sa mga karsada ug sa mga sudlonon nga dapit, nga maoy mangisyu og illegal swertres.

Gipangsikop ba sa kapolisan ang mga nagbantay niining maong mga gagmay’ng kahon nga gihimong outlets sa illegal swertres? Wala.

Kon ako’y Mayor Labella nga mihatag og kamandoan apan wa tumana sa mga polis, dili ko malipay.