Kinsa ba gud ang deserving?

Ning panahona daghang mga tawo ang buot mamahimong entitled sa tanan nilang pagahimoon.

Entitlement, kun ang panghunahuna nga kinahanglang dunay bugti ang matag buhat nga mahimo sa usa ka tawo, nga sa ato pa dunay reward kun ganti ang matag paningkamot.

Mao nga human sa bisan unsang panlimbasog nahimong normal ang pagpaabot og ganti. Ganti nga mahimong kapasikaran nga kinahanglang ihatag ang best ni bisan kinsa ug kun ugaling wala man gani madawat ang gikahinamang ganti mahimong kapasikaran kini sa dakong pagkasagmuyo.

Nindot man gyud nga dunay incentive. Gani makatabang man kini aron mamahimong mas motivated ang si bisan kinsa nga na involved. Apan dili sa tanang higayon.

Kay ang paglihok alang sa bisan unsang kawsa kinahanglang dili lang nato ibase sa reward and punishment.

Sama pananglit sa atong pagsabot sa kaluwasan. Ang kaluwasan mahimong sabton nato ingon nga reward and punishment gihapon nga conditioning. Kun magbinuotan anaa ang langit. Kun magdinautan anaa ang impiyerno. Kini ang hinungdan kun nganong nahimong taphaw usahay ang pagbinuotan ug pagminaayo.

Nagminaayo ang usa ka tawo tungod ning mosunod nga mga rason:

1.  Walay mahimo ang tawo mao nga siya magbinuotan aron lamang siya mabuhi ug mo-survive.

2.  Nagbinuotan ang tawo tungod kay mao kini ang anaa sa sulod sa iyang kasingkasing ug hunahuna.Ang pagbinuotan ingon nga natural nga birtud sa tawo mogawas ug mogawas ra gyud bisan kun walay nagpaabot nga ganti.

3.  Nagbinuotan gumikan sa gugma. Ang gugma maoy hinungdan kun nganong nagbinuotan ang usa ka tawo. kun wala ang gugma walay hinungdan ang tanan.

May ganti man o wala mas maayo nga manlimbasog sa paghimo og maayo ug dili ang paghimo sa dautan.