Pandemiya daghang giguba

Usahay, tungod sa kalisod ug kahadlok, hasta mga alagad sa Diyos (hinuon dili tanan) makapamuhi sa ilang hugot nga paggakos sa Ginoo.

Daw mga dahon nga bisag giunsag paningkamot nga dili mahimulag sa bagon, gilupig gyod ang kalig-on sa pagpakigharong batok sa kamangtas ni COVID-19, kinsa padayong nanghasi sa tibuok kalibotan, mipahapla sa ekonomiya ug nakakalas nag daghang kinabuhi.

Ang COVID-19 walay gitahod. Sobra kamaldito! Dili mahadlok og krus. Bisag gibantayan na sa mga sagradong imahen ang tibuok simbahan, hasta mga pari nangaigo! Apan angay bang itago sa mga mata sa katawhan kon adunay pari sa parokya nga nataptan niining virusa?

Saludo ko sa Basilica Minore del Santo Niño. Kay dihang gisulong sa COVID-19 ang maong milagrosong simbahan ug may pipila ka pari ang nangataptan, wala gyod magpanuko si Rector, Rev. Fr. Pacifico C. Nohara Jr. OSA ug mga kauban sa pagpahibalo niini ngadto sa publiko.

Gani, sa pagsulat niini, sa ilang online 8:00 a.m. mass, sa akto sa Kalibotanong Pag-ampo, giapil nila ang ngalan sa usa nila ka kauban, kinsa na-COVID pod, diha sa ilang pagpangilaba ngadto ni Sr. Sto. Niño nga unta makarekober na kini.

Dihang si Cebu Archbishop Jose Palma nataptan, mianunsiyo sab nga siya ug mga kauban sa palasyo, gi-COVID ug didto nagpaalim sa pribadong ospital. Niadtong higayona, gihimo ang contact tracing, gi-disinfect ang palasyo ug relihiyosong gisunod ang tanang lagda sa health protocols.

Bulawanong kinaiya nilang Fr. Nohara ug Arcbishop Palma nga nagpakitag gugma’g pagmahal ngadto sa katawhan, sa Ginoo ug sa ilang kaugalingon.

Apan makapahibulong. May pipila ka alagad sa simbahan, kinsa gustong itago ang tinuod. Nga imbes ibulgar nga adunay kaubang na-COVID, gitakpan hinuon.

Sa bagay, walay desisyon nga sayop. Tanan, husto! Aduna lay good, better and the best. Okay ra kaayo, kon ang intention sa maong paglimod, makaayo sa katawhan. Pero kon makadaot, aw tulubagon na kini nila ngadto sa Ginoo.

Ning panahon sa pandemiya, daghang tin-awng panghunahuna ang giguba ug nangaguba. Aron magpabiling lig-on: Please put God above all priorities in life.

There are only two choices: God or Devil? Select the best! Just remember: It’s better to die for God than to eat Satan’s tricks.