Insecure

Taliwala sa kawad-on nga gisagubang sa katawhan tungod sa krisis, migitib ang paglaum sa matag-usa diha sa pagtinabangay pinaagi sa pagtampo-tampo aron ang mga kabus nga nawad-an og pangita tungod sa pandemya makalabang sa kalisod ug masalbar sa kagutom ang ilang pamilya.

Ang dalaygong pamaagi pagtabang sa mga kabus dinhi sa nasud nagsugod sa usa ka kumunidad didto sa dakbayan sa Quezon.

Ang batan-ong negosyante nga si Ana Patricia Non sa Maginhawa Street didto sa Teachers Village sa Quezon City maoy unang nakahunahuna nga magtukod og community pantry.

Usa ka gamay'ng estante nga dunay mga pagkaon ang iyang gibutang daplin sa karsada diin libre nga mokuha si bisan kinsa sigun sa iyang panginahanglan.

Ang mga pagkaon gikan sab sa mga donasyon. Ang Maginhawa community pantry nag-viral sa social media ug nahimong inspirasyon sa ubang mga dapit lakip na dinhi sa dakbayan ug lalawigan sa Sugbo.

Ang Barangay Guadalupe maoy unang nagmugna og community pantry dinhi sa dakbayan hangtud nga misunod ang ubang dapit sama sa Tisa ug Sambag 2.

Ang tinuod dili bag-o ang maong paagi sa pagtinabangay. Wa ni kalainan sa Food Bank nga unang gitukod didto sa Amerika niadtong 1967.

Ang St. Mary's Food Bank maoy unang food bank sa kalibotan nga gitukod aron pagtabang sa mga kabus nga way makaon.

Apan makaguol nga hunahunaon nga dinhi sa atong nasud dautan alang sa ubang opisyal ug ahensiya sa gobyerno ang pagtabang.

Inay suportahan ug dasigon ang publiko nga dunay katakos sa pagtabang gihasi ug gihulga na hinuon pinaagi sa pagpamasangil nila nga kaalyado sa mga kumunistang rebelde.

Rebelde ba diay ang pagtabang sa imong isigkatawo? Nan kung rebelde man alang sa ubang mga opisyal sa gobyerno ang pagtabang, himoa ang inyong responsibilidad aron way rebelde sa inyong panan-aw.

Tataw nga ang mga opisyal sa gobyerno nga miisip sa nagpasiugda sa community pantry nga mga rebelde mao ang mga opisyal nga insecure sa ilang trabaho tungod kay way nahimo pagtabang sa mga kabus taliwa sa dakong pundo sa ilang mga ahensiya.

Pinaagi sa pagtinabangay sa publiko nabisto ang kainutil sa mga ahensiya nga gitahasan pagtabang unta sa mga kabus. Ug aron pagtabon sa ilang ka inutil pasanginlan ang mga nagpasiugda nga mga rebelde.

Laing makasubo nga hulagway nga atong nasaksihan niini mao ang kamapahimuslanon ug kahakog sa uban.

Sa usa ka community pantry didto sa Pasig, nag-viral sab ang video sa grupo sa mga babaye nga mihurot gyud sa tanang pagkaon.

Ayaw sab intawon abusahi, tungod kay libre inyo pud nga hakoton ang tanan. Atong hinumduman nga dunay kinutoban ang kamanggihatagon sa tawo. Kun inyong abusahan luoy intawon ang ubang nagkinahanglan.

Aron mosustinir ang operasyon sa community pantry gikinahanglan ang disiplina sa tanang beneficiaries niini.