Hurot nang bilib, suya ray nahibilin

Taliwala sa mga spekulasyon, mipadayag si Presidente Duterte nga wala siya’y sakit nga mahimong makapugong kaniya sa pagtuman sa iyang katungdanan isip pangulo.  Dason pa sa Presidente nga angay nga dugangan pa ang pag-ampo niadto’ng mga tawo nga naghandom sa iyang kamatayon.  Dako’ng trahedya sa kinabuhi ang pagpangandoy sa kamatayon.  Ginaingon gani nga “Dili maayo ang pagpangandoy sa kamatayon sa uban kay kon buhaton mo kini, wala na gyu’y nahibilin nga kaayo diha kanimo.”  Mahurot na gani ang bilib, sagad suyâ na lang ang mahibilin.  Saoonz!

Kon makahilis pa’g bilbil

Sumala sa survey nga gipahigayon sa SWS, 65 por siyento sa mga Pinoy ang nagtuo nga ang kahimtang sa panglawas ni Presidente Duterte usa ka kahimtang nga may labot ang katawhan busa kinahanglan nga ipublikar.  Dili ikahibulong ang resulta sa survey.  Manginlabot man ngani ang katawhan sa kahimtang sa iyang silingan bisan walay ranggo sa katilingban, sa Presidente na ba kaha. Gani, kon makahilis pa sa bilbil ang pagpanglibak ug paghisgot sa kahimtang sa ubang tawo, tingale pulos “slim” ang mga Pinoy.  Baya no!

Nagkapuliki’g pagpanagang

Gisalindot lang sa DOH ang pagpanaway sa Health Care Alliance Against COVID-19 (HPAAC) nga nausik lamang ang pagpaubos sa ECQ sa NCR tungod kay padayon man gihapon ang pagsaka sa kaso sa COVID-19.  Lisod sagngon sa kagamhanan ang nagkadaghan nga pagsaway niini.  Makapahinumdum kanako sa pangutana sa Huwes ngadto sa testigos-kihante kon unsa’ng orasa siya gikulata sa iyang mga sinumbong. Matud pa sa testigos-kihante, “Lisod tubagon imong pangutana Nyor Huwes, uy.  Nagkapuliki na gani ko’g sagang sa ilang pagkulata nako, unya motan-aw pa jud ko sa akong relo?” Pagkatoytoy!

Usikan ang tawo

Giangkon sa DOH nga sa Central Visayas, adunay 32 ka doses, gikan sa 134,160 ka doses sa bakuna batok COVID-19 ang nausik ug wala mapusli. Ang hinungdan mao ang wala pagtunga sa mga gitakda nga recipient sa bakuna ug ang kakulang sa sulod sa vial sa ubang bakuna hinungdan sa pag-reject niini.  Ang kahadlok sa side effect sa pagpabakuna usa sa hinungdan sa maong pagka-usik.  Tawo lamang ang mag-usik-usik sa paagi nga bisan ang kinaiyahan dili kahilisan.  Maypa’g moligeeed!

Way ulihan

Sumala pa sa Sugar Regulatory Administration, mikunhod ang produksyon sa asukal sa buwan sa Marso ni’ng tuiga. Epekto sa La Niña ang hinungdan sa pagkunhod. Baliktad ang nahitabo sa akong amigo. Tungod sa dautan’g panahon dala sa La Niña, mapalta kanunay ang iyang outdoor exercises hinungdan sa pagsaka sa iyang “blood sugar.” Sa pagkunhod sa produksyon sa asukal, momahal ang presyo niini; sa pagsaka sa blood sugar sa akong amigo, kinahanglan mopalit siya’g tambal.  Managlahi tuod nga kahimtang, apan usa ra’y mabulahan: NEGOSYANTE RA. Way ulihan si Juan!