Ikaduhang pulong

Karong adlawa adto ka uban nako sa Paraiso (Cf.23;43)

Mabiaybiayon ang kalibotan. Mao kini ang panlantaw sa kinabag-an. Mao nga daghan nato ang nanlimbasog kutob sa mahimo, Makita ug masinati lang nato ang tinud-anay nga kalipay. Kalipay nga bisan kun salingkapaw ato gihapong pangandoy nga unta makasinati kita og kalipay.

Ang uban kanato sa atong pagpangita niini nahisalaag ngadto sa mga hinanaling merkado sa katagbawan. Bahandi, gahum, kaambong o kaanyag. Alang sa kadaghanan kanato kun daghan ka og kwarta, nan, daw paraiso ang imong kinabuhi. Mahimong mapalit mo bisan unsa nga imong gusto. Apan hinumdomi nga ang kwarta bisan unsa pa siya kadaghan dili mahimong makapalit og matinud-anong higala.

Ang gahum alang sa uban maoy makapahimong paraiso sa ilang kinabuhi. Kini tungod kay mahimong himoon nila ang tanan nga ilang buot himoon. Mahimong pasayawon ang si bisan kinsa sa ilang mga palad gumikan sa kahadlok. Apan ang kahadlok nga imong gimantala dili man sukaranan aron mamahimong nga anaa ang matinud-anong pagtahud. Bisan gani ang kaambong ug kaanyag dili man sukaranan nga ikaw higugmaon. Tingali mahimong gamiton sanglit ang kaambong ug kaanyag usahay madanihon man kaayo. Makabihag ug usahay makalaglag.

Ang atong mga katigulangan nakasinati gyud og paraiso. Kini tungod kay sila kontento sa bisan unsang anaa sa ilang palibot. Gawas nga sila kontento sila pud manggihunahunaon sa buhing matuod nga dili lang sila ang anaa sa kalibutan.

Adunay laing mga tawo nga sama kanila naghatag og bili sa kaangayan, pagtahud, ug paghigugma sa kalikupan. Anaa na ang han-ay sa ilang pagkinabuhi apan gigusbat lamang sa dihang nalandig sa atong mga baybayon ang mga langyaw aron pagpahamtang sa mga mentalidad nga haom uyamot sa ilang bansagon nga Castellano.

Ang atong mga katigulangan inanay nga nihangop uban ang tinguha nga mabuhi sa paagi nga dungganan, mao nga bisan malisud ang kahimtang gumikan sa mga malupigon padayong nahimong paraiso alang kanila ang palibot ug mga panghitabo. Padayong gigambalay ang paraiso sa ngalan sa tinuohan. Ug mao kana nga hangtud karon, padayon kitang mihangop sa pagtulon-an ug gani kita mismo naningkamot man nga makasabwag niini ngadto sa uban. Kini tungod kay nisalig kita sa buhing matuod nga ang kaayo dunay taliabot gna ganti nga mao ang paraiso nga natagamtaman sa mahinulsolong kawatan nga si Dimas.

Malisod tugkaron ang grasya sa Dios. Ang Dios nakakita gyud sa atong bili wala niya makita ang kahugawan nga nia kanato. Padayon kita niyang gihigugma ug gihatagan og kahigayonan nga sama sa ubang mahinulsolon makasulod unta sa ginghariang langitnon. Ang matuod nga puloy-anan natong tanan. Ang paraiso diin dili na pangutana kun unsa ang atong kagikan, kun unsa ang bulok sa atong panit, kun dato ba kita o kabus. Ang paraiso kahimtang diha sa presensiya sa Dios nga maoy bugtong hinungdan kun nganong makaingon kita nga tinuod gyud diay ang paraiso.

PAG-AMPO.

O Dios nga mahigugmaon, maluloy-on ug labing manggihatagon, kami nga nagkapundok dinhi aron pagpatalinghog sa ikaduhang katapusang pulong sa imong anak nga si Jesus. Pasayloa ang among hiwi mga hunahuna mahitungod sa imong pagkamaloloy-on. Usahay among giabusohan ang imong kaayo sa kapasikaran nga mahatagan sa kaluwasan nga imong gihatag diha diha kang Dimas nga nagbitay sa krus kuyog kanimo. Apan lahi siya kay kanamo. Niadtong mga gutloa, gipadayag gyud niya ang iyang pagbasul butang nga malisud nimo balibaran. Ania kami Amahan nangandoy sa imong saad nga dili hitupngan. Unta karong adlawa ikaw moingon usab kanamong imong mga masalaypon nga mga anak: Karong adlawa adto ka uban nako sa Paraiso (Cf.23;43) .