Tambal sa Espirito hanong kauhaw

Semana Santa na, panahon sa pagpamalandong sa unsa man nga mga nabuhat nato ug sa paghinulsol sa mga kasaypanan nga nahimo. Mao kini ang naandan sa pagtimaan nato kada Semana Santa, apan dili man seguro kinahanglan nga paaboton nato kining panahona una kita mamalandong ug maghihulsol kay kada adlaw mahimo man nato kini.

Sa pagsugod sa pandemiya sa nakalabayng tuig nahikawan kita sa paghimo sa mga bulohaton panahon sa Holy Week kay gipahunong man usab lagi aron malikayan nga mokuyanap ang coronavirus.

Karong tuiga murag maingon ingon usab ang mahitabo ilabi na sa mga dapit karon sa nasud nga gibalik sa paghigpit ang quarantine status kay mitaas na usab ang covid case.

Ang uban makaingon nganong nahitabo man kini? Nganong gitugot man kini nga sa panahon sa paghandum sa kasakit sa atong Manunubos murag gihikawan man kita nga himoon ang mga traditional nga kalihokan?

Mibati kita sa kauhaw sa atong panginahanglan sa Espiritohanong tubig nga maoy makahatag og katagbawan sa atong kalag.

Mo usa ka tuig na nga nakasinati og krisis dili lang ang lawasnong pangnahanglan kon dili apil ang atong spiritual need.

Dili paigo nga kutob lang sa balay ang pagsimba gamit ang online portal kay susama ra sa tinulo sa tubig ang matagamtam sa atong espirito itandi kong moadto gyud sa sulod sa simbahan ug modawat sa lawas ug dugo ni Kristo.

Ang krisis nga nasinati sa katawhan, ang kauhaw nga gibati sa atong kalag gamay ra itandi sa kauhaw nga gibati ni Hesus dihang gisakit Siya sa mga Hudeyo.

Gihimo kini ni Hesus tungod sa Iyang dako nga gugma kanato nga gitubos Niya gikan sa sala.

Sa nahitabo karon, gikinahanglan nato nga hugtan pa ang.atong pagsalig sa atong Ginoo kay anaa ra Siya pirme naga uban kanato. Dunay mga panghitabo sa atong kinabuhi abti nato og gibiyaan kita Niya apan wala sanglit gitugot Niya nga mahitabo aron pahinumduman kita nga anaa Siya kanunay naga uban kanato.

Ang pagsalig ug pagtoo sa Ginoo ang tambal sa atong kauhaw sa Espiritohanong kauhaw.