Bugti sa Batang Jesus

Si Rayna Juana ang gihatagan og gasa ni Fernando Magallanes sa dihang siya gibunyagan. Ang maong gasa mao man ang imahen ni Senyor Santo Nino. Gihatag kini sa kondisyon nga iyang sunogon atubangan sa mga Espanyol ang mga imahen sa iyang mga anitos. Nahitabo kini 500 ka gatos na ka mga tuig ang nilabay.

Mao nga hangtud karon usa ka dakong gidili ang pagpabilin sa mga naandang balansayon sa paganismo ug ang pagpasidungog sa mga espiritu (elemental spirits) diha sa pagbansay sa mga diwata ug uban pa’ng mga naandang buhat sa mga patuotuo ug syncretism (diin anaa ang mixture kun panagsagol sa atong balansayon isip Katoliko ug ang mga butang nga atong napanunod sa atong mga katigulangan.)

Ning panahon sa kabag-ohan anaa gihapon ang mga tawo nga naghimo og mga dayag nga pagpangilad ginamit kining maong pamaagi. Sa kapasikaran nga daghanan kanato ang makuryoso man gyud sa mga butang espirutahon.

Gani daghan man kanato ang nahimong madani gyud sa bisan unsang ritwal. Mao nga daghang mga tambalan ang nipahimulos niini ug daghang mga mangingilad ang mahimong mogamit sa ngalan sa Ginoo aron pagdani sa uban nga motuo ug mohatag kay lagi maoy “gipadayag” ug maoy gihatag nga tahas kun pasugo. Ang resulta dugang kagubot. Ug daghang mga karnero usab ang mahimong mahisalaag.

Subo lang pud palandungon sanglit dunay anaa sa simbahan gani uban kanila mga pari man gyud ang ni- tolerate ning maong matang sa balansayon. Bisan pa man gani kun wala ang opisyal nga pagtuo sa simbahan mismo apan sila mismo diha kunohay sa ilang paggiya ang nidason nga ang usa ka vision kun panan-awon usa ka matuod nga panan-awon bisan pa man kun wala kini dasoni sa mga teologo ni makapasar sa sukaranan nga gilatid sa Inahang Santa Iglesya.

Unta sa atong pagsaulog sa 500 years of Christianity nihamtong na kita sa ating pagtuo ug dili sa atong mga patuotuo. Ug unta ang mga anaa sa sapot dili mosugnod sa dugang sidlak sa pangilad sa mga alaut nga mga anawim ning atong kapanahonan karon.

Ang milagro dili na kinahanglanon nga isipon natong extraordinary ug supernatural kondili ang kinabuhi mismo mao naman ang sukaranan niini.  Mao nga kun buot kitang maghari ang Batang Jesus ngari kanato, ato untang isalikway ang bisan unsang iya sa demonyo.