Tinonto nga telco
Pagkahibawo nako niadtong Dominggo nga apil ang Consolacion sa pinili lang nga mga lugar nga makaapil sa paglusad sa ikatulong kompaniya sa telepono, namalihug dayon kog drayber sa habalhabal sa pagpalit og sim card aron mosuway sa ilang promo nga unlimited data nga way speed cap sud sa 30 ka adlaw sugod gahapon, Marso 8.
Human sa dul-an sa usa ka oras, nibalik ang drayber ug nipahibawo nga wa pay tindahan nga namaligya. Gitambagan siya sa usa sa mga tindera sa giadtoang shopping mall nga pasuwayan og palit online.
* * *
Sa kasaba nila sa media sa pagsugod na sa ilang operasyon, nihit og detalye ang telco. Blangko ang ilang website sa listahan sa mga tindahan nga kapalitan sa sim ug hanap ang kasayoran unsaon pag-download ang ilang app ug asa makapa-load aron makaapil sa promo.
Way namaligya sa ilang sim online. Pag-search nako sa online stores sa ilang ngan, karibal nga sim cards ug promo ang nanggawas.
Wa say nitubag sa mga pangutana sa ilang social media pages. Nagkomedyahay na lang ang mga nangutana nga wa pa tingali ka-hire og tigtubag.
* * *
Pagka Lunes, gipadad-an ko sa among silingan og link aron maka-sign up sa ilang promo. Gidalidali nako og abli sa desktop pero gibalibaran ko nga kinahanglang moagi og telepono.
Paggamit nako og telepono, gibalibaran na sab nga di compatible sa ilang sim. Bisan nibalhin sa mas bag-ong telepono, nasango gihapon.
Way bisan usa sa among telepono sa bay ang naapil sa lista sa mga telepono nga silay nagbuot nga mao ray compatible sa ilang sim.
* * *
Mas nabawo ang lain nakong silingan nga labihang sayoha nga nilinya sa tindahan nga namaligya sa sim pero giingnan nga kinahanglan una siyang mopalit sa ilang compatible nga telepono.
Nahibaw-an niya nga may laing tindahan nga bisan compatible na ang telepono papaliton gihapon ang kustomer og laing gadget sa di pa baligyaan sa sim.
Lit-ag ba lang ang promo aron moburot ang telco ug kaubang mga tindahan? May sukaranan hinuon ang pagduda nga tinuyo ang paglisudlisod aron nga di matuk-an ang di pa andam nilang sistema.
Maong daghan nang nidason sa sugyot nga usbon ang ilang ngan ngadto sa “tinonto.”
* * *
- Latest
