Misa Requiem

Nahimo naman hinuon nakong batasan nga matag gabii mogahin gyud ko og higayon alang sa mga kalag. Daghang mga kalag nga nagkinahangan sa pag-ampo ug pamisa mao nga alas otso sa gabii himoon gyud nakong kahigayonan ang pagsaulog sa santos nga Misa. Akong basahon ang matag pangalan bisan kun napulog duha ka pahina lamang matag gabii aron sa ingon sila akong maapil sa akong mga pag-ampo.

Maayo na lang nga pinaagi niini daghan usab ang mosugat kanako sa langit labina gyud ning panahon sa kawalay kasigurohan.

Ang pag-ampo alang sa mga nangamatay usa man ka spiritual works of mercy.

Kini ang ilang gikinahanglan ug kini ang ilang gipangandoy. Nadugtong gihapon kita bisan sa kalibutan sa mga patay.

Sa laing  bahin, nakita ko ang akong kaugalingong kinabuhi. Limitado kini kaayo.

Gumikan sa maong kalimitado paningkamotan gyud unta nga mamahimo kining mapuslanon bisan hangtud sa katapusang gutlo. Subo lang palandungon kay bugtong nakita sa mga tawo sa kinabuhi dili ang imong kaayo kondili ang imong kadautan.

Dili ang mga maayong buhat kondili ang imong mga kasaypanan.

Alang nila mas nindot sud-ongon ang imong kasaypanan kaysa imong mga maayong buhat. Ang pagsud-ong sa kasaypanan mao man ang makapahimo nilang labaw kay sa ilang gituohan.

Ang pagsud-ong sa imong kadautan maoy makapahimo nilang maayo sa ilang panghunahuna.

Apan ingon ana gyud ang kinabuhi. Kinahanglan nato nga mohimo og panlimbasog, magpabilin gihapon nga magpuyo sa kaayo bisan pa man kun giayran ka mismo sa imong giisip nga sukaranan sa imong pagpakabuhi. Ingon ana ang kalibutan mayubiton sa hilabihan.

Balik sa Misa Requiem. Sa akong pagbasa sa mga ngalan sa mga kalag nga akong gimisahan adlaw adlaw nahimong daw sa malinawon ang akong pamati.

Ug personal mente nagtuo ako nga sa akong pag-ampo sa mga kalag nga akong gipangmisahan adlaw-adlaw sila usab wala magpasagad sa akong kahimtang.

Dunay mga higayon nga sa dihang may gi-pray over ako, salamat sa Dios nga naayo ra pud ang nahisgutang biktima.

Dili tungod sa akong katakus ug sa akong kahimtang kondili tungod sa grasya. Paahulay nga dayon ihatag kanila O Ginoo ug ang kahayag nga way pagkapalong modan-ag unta kanila hangtud sa kahangturan. Hinaut pa unta.