Abli na ang ganghaan

Bisan sa padayong hulga  sa coronavirus disease, nakadesisyon na ang kagamhanan sa probinsiya sa Sugbo nga mangabli na kini sa ganghaan niini alang niadtong mga turista gikan sa nagkalainlaing lalawigan sa nasud nga gusto nga moduaw dinhi.

Sa meeting niadtong niaging semana uban ni Gobernador Gwendolyn Garcia, ang Provincial Tourism Task Force miuyon na nga ablihan ang pultahan sa probinisya alang niadtong mga buot mobisita sa mga tourist destinations niini.

Kahinumdoman nga grabe ang pagkahagba sa industriya sa turismo sa Sugbo gumikan sa pagsira sa mga hotel, resort ug ubang tourist attractions sa lalawigan tungod lagi sa pag-arangkada sa coronavirus disease o COVID-19.

Sulod sa subra sa napulo ka bulan, gilangaw ang maong industriya gumikan sa implementasyon sa mga health protocol nga nagdili pagsulod sa mga dili taga Sugbo. Tungod niini, daghan ang nawad-an sa ilang mga trabaho gumikan sa pagsira usab sa mga negosyo.

Padayon pa ang dakong hulga sa makamatay nga COVID-19. Ug hangtud nga walay bakuna ug ubang panagang niini sama sa tambal, pabilin ang mga lagda sa maayong panglawas nga angay tamdan sa katawhan.

Bisan pa man niini, dili mahitabo nga padayong malugmok ang atong lokal nga ekonomiya gumikan sa pandemiya. Mao nga kinahanglan nga mangita og paagi ang atong lokal nga mga kagamhanan aron pagbanhaw sa mga industriya.

Mao nga nakadesider ang kagamhanang probinsiyal nga ablihan na ang pultahan sa lalawigan alang sa mga bisita gikan sa laing mga lugar. Kini isip pagsalbar sa nagtinga na nga industriya sa turismo nga naigo pag-ayo sa pandemiya.

Dili ikalimod nga turismo ang usa sa mga bida nga nag-aswat sa ekonomiya sa Sugbo. Gani bilyones ka pesos ang revenue nga makuha sa lalawigan gikan sa maong industriya matag tuig. Ug angay lamang nga mobalik na kini pag-arangkada bisan pa man niining pandemiya.