Gustong paliton og balik ang yuta

Dear Atty. Divine,

Ang yuta sa akong lolo nabaligya na niadtong 2001. Ang gikuptan sa nakapalit Deed of Sale ug photo copy sa tax declaration.  Nakapirma niini akong mama ug iyang mga igsuon kay patay na man akong lolo sa dihang gibaligya ang yuta. Pag 2004 gusto na sa nakapalit nga i-process ang pag-transfer sa property ngadto sa ilang name. Apan wa kini nila ma-process kay di na man ma-locate ang copy sa original title sa property. Ila na gani gipa-survey og usab apan wa gihapon silay nahimo so ila nalang gipasagdan ang property.  Ang akong pangutana kun makapapahawa ba sila namo nga wa pa man nila ma-transfer sa ilang pangan ang yuta? Kun among paliton pagbalik ang property unsay dapat namong buhaton? Duna pa bay katungod nga mangayo og share ang mga igsuon ni mama kun among paliton ang property? Daghang salamat.

Yenyen

* * *

Dear Yenyen,

Bisan kun wa pa ma-transfer ang property sa pangan sa nakapalit pwede gyud mo papahawaon kay gibaligya na man sa mga heirs ang maong yuta. Naa man silay gikuptan nga Deed of Sale pagmatuod niini. Kun inyong paliton og balik ang yuta pwede ra gyud kun mosugot niini ang inyong gibaligyaan. Apan posible nga ang presyo sa inyong pagbaligya sa una  dili na mao ang presyo karon sa inyong pagpalit. Sabuta lang ninyo ang buyer kun mosugot siya nga inyong paliton. Ang mga igsuon sa imong mama  wa na silay katungod nga mangayo og share kay ila na mang gibaligya ang ilang share, gawas lang kun motampo sad sila aron mapalit og balik ang yuta. Thanks and God bless.

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.