Give and take lang

Nakaginhawa ang mga Sto. Niño vendors human gitugotan sa Cebu City government nga makabalik sa sila naandan nilang pwesto haduol sa Basilica sugod kagahapong adlawa.

Sayo niini mitiyabaw sila dihang gibalhin didto sa kilid sa Maritima building atol sa panahon sa kapistahan sa Senyor Sto. Niño sanglit wala naman sila mahilini sa ilang mga baligya kay tuyoan man kaayo ang dapit.

Apan gidungog ang ilang pangalyupo sa kagamhanan nga makabalik ubos sa kondisyon nga gikinahanglan nilang sundon. Nalatid sa undertaking nga ilang pirmahan mao ang pagsunod sa mga health protocols sama sa social distancing, gitagalan sila og oras nga alas sa buntag hangtod sa alas 6 sa gabii, magpulipuli ang schedule sa mga vendors aron malimitahan ang mga tawo, dili mag-repair og imahen sa ilang pwesto ug mobayad usab sila og arkabala.

Ang makasupak niini, mamahimong bawian sa pribilehiyo sa pagpaninda sa dapit sanglit nalatid sa kondisyon nga temporaryo ang pagtugot kanila.

Adunay mga midawat niini ug mipirma, gani nagpasalamat sila nga gibalik ug andam silang motuman sa kasabotan.

Apan naa usay misupak sa undertaking kay para nila nagbutang kini og hulga sa ilang panginabuhi kay basin kuno pangitaan og sayop sayon nalang daw sila mapapahawa.

Gusto nila nga mobalik nga dili mopirma sa naasoy’ng undertaking, apan hugot ang baruganan sa siyudad nga papirmahon sila aron maseguro ang implementasyon sa protocol ilabi na niining panahon sa pandemiya.

Sa pagkakaron mao kini ang win-win solution tali sa siyudad ug sa mga vendors. Maayo gani kay gipabalik sila og sayo, wala dugaya ang ilang pag antos didto sa Maritima nga walay halin.  Maayo ganinga  wala gamita sa syudad ang mando sa DILG nga hawanan ang kadalanan sa syudad. Kung gigamit kini dili na gyud sila kabalik sa naandan nga pwesto.

Ang gihimo sa siyudad nagpakita sa ilang konsiderasyon sa mga vendors nga angayang tan-awon usab sa mga vendors.

Alang sa ubang vendors ang mahinungdanon nga makabalik na sila sa ilang panginabuhi. Give and take lang, gihatag ang ilang gipangayo nga makabalik, panahon usab nga mosanong pud sila sa gipangayo sa syudad. Hinuon katungod pud nila nga himoon ang gituohan nilang makaayo alang kanila. Kung makasustiner sila nga “magmatigasan” sa tinagalog pa sa city government, puwed ra nga dili sila mopirma apan dili sila matugotan nga makaabli sa ilang tindahan.